د طالبانو ویاند ذبیحالله مجاهد د یکشنبې په ورځ، د زمري ۱۱مه، د سمېع سادات په مشرۍ د افغانستان متحدې جبهې له لوري د پوځي عملیاتو د پیل اعلان ته غبرګون وښود. هغه د دې جبهې د فعالیتونو په اړه د یوې پوښتنې په ځواب کې وویل چې د طالبانو مخالفو ډلو فعالیتونه تر ډېره په ټولنیزو رسنیو او تبلیغاتي خپرونو پورې محدود دي.
مجاهد ادعا وکړه چې د نوموړو ډلو په افغانستان کې عملي حضور نشته. هغه زیاته کړه چې طالبان اوس مهال په هېواد کې له داسې حالت سره نه دي مخامخ او د ده په وینا، په افغانستان کې هېڅ نوې جبهه یا منظمه ډله فعالیت نه کوي.
د طالبانو ویاند، سره له دې، وویل چې دا نه شي ردولی چې دغه ډلې په تېرو وختونو کې موجودې وې. د هغه په وینا، دغو جریانونو پخوا د لویو ډلو په توګه فعالیت کاوه او د قومي، ژبني، مذهبي او نژادي اختلافاتو څخه یې د خپلو تشکیلاتو د جوړولو او پراخولو لپاره ګټه اخیسته.
مجاهد همداراز ادعا وکړه چې دغه جریانونه اوس له افغانستان څخه بهر، د نویو نومونو او عنوانونو په غوره کولو سره هڅه کوي چې هېواد ناامنه کړي یا د افغانستان د ناامنۍ انځور وړاندې کړي. هغه وویل چې دا ډلې له هېواده بهر مېشتې دي او خپل فعالیتونه له هماغه ځایه پر مخ وړي.
د طالبانو ویاند په دوام کې ادعا وکړه چې دغه ډلې له افغانستان څخه بهر روزنیز کمپونه لري او د ځینو استخباراتي ادارو له خوا مالي ملاتړ ترلاسه کوي. هغه همداراز وویل چې د دغو جریانونو غړي له بېلابېلو استخباراتي بنسټونو سره همکاري کوي. دا څرګندونې داسې مهال کېږي چې مجاهد د خپلو دغو ادعاوو لپاره کوم سند یا ثبوت نه دی وړاندې کړی.
لیکواله:سلیمه آریایي
