د افغانستان سفارت په اسټرالیا کې اعلان کړی چې د استرالیا په پارلمان کې د افغانستان له خلکو سره د پارلماني دوستۍ ډلې یو ځل بیا خپل فعالیتونه پیل کړي دي. د سفارت په وینا، د دې ډلې د بیا فعالېدو موخه له افغان خلکو سره د همغږۍ پیاوړتیا او د افغانستان وضعیت ته د پاملرنې دوام دی.
د خبرپاڼې له مخې، د دې ډلې د بیا اعلان مراسم د اسټرالیا د ولسي جرګې او مشرانو جرګې د یو شمېر غړو، د اسټرالیا د حکومت استازو، مدني بنسټونو او د افغان کډوالو د ټولنې د غړو په حضور کې ترسره شول.
په دې غونډه کې، جولیان هیل، چې له افغان خلکو سره د پارلماني دوستۍ د ډلې ګډ مشر دی، د افغانستان د خلکو د دوو هېوادونو د اړیکو په پراختیا کې د رول ستاینه وکړه. هغه وویل چې د بشري حقونو ملاتړ او له افغانستان سره اړیکې ساتل د دې ډلې له مهمو موخو څخه دي. نوموړي همدارنګه د افغانستان د سفارت د دیپلوماټیکو فعالیتونو او په اسټرالیا کې د افغان ټولنې د رول ستاینه وکړه.
مټ ټېسبېټ، د اسټرالیا د بهرنیو چارو د وزیر مرستیال، هم د خپل هېواد له لوري د افغانستان د خلکو د ملاتړ پر دوام ټینګار وکړ. هغه وویل چې د افغانستان اوسنی وضعیت باید دایمي حالت نه شي او نړیواله ټولنه باید دې موضوع ته خپل پام روان وساتي.
هغه همدارنګه د ښځو او نجونو د حقونو ملاتړ او د بشري حقونو په برخه کې د طالبانو د ځوابورکولو پر اړتیا ټینګار وکړ او د افغانستان د بشري وضعیت په اړه یې د دوامدارې پاملرنې غوښتنه وکړه.
مونیک رایان، چې د دې ډلې بله ګډه مشره ده، د افغانستان او اسټرالیا ترمنځ د اوږدمهالو اړیکو پر اهمیت ټینګار وکړ. هغې په استرالیا کې د افغان ټولنې رول وستایه چې د افغانستان د حالاتو په اړه پوهاوی خپروي او د افغان خلکو نظرونه انتقالوي.
د افغانستان سفیر په اسټرالیا کې د دې ډلې د بیا فعالېدو د پارلمان د پرېکړې هرکلی وکړ او دا یې د افغان خلکو لپاره د سیاسي او اخلاقي ملاتړ د دوام نښه وبلله. هغه وویل چې افغانان ملاتړ او همغږۍ ته اړتیا لري او ټینګار یې وکړ چې نړیوالې مرستې باید د افغان خلکو د ملاتړ لپاره دوام ومومي.
په پای کې، د غونډې ګډونوالو د ښځو او نجونو د حقونو د ملاتړ، د بشري حقونو د لاسته راوړنو د ساتنې او د افغانستان د بشري بحران په اړه د نړیوالې ټولنې د دوامدارې پاملرنې پر اړتیا ټینګار وکړ.
لیکواله:سلیمه آریایي
