باوري سرچینې وايي چې یو ځايي ورزشکار چې په عین وخت کې یې د صرافۍ کاروبار هم درلود، د پنجشنبې په ورځ د تخار ولایت د مرکز تالقان ښار د «بهترین عالم» جومات ته نږدې د وسلوالو کسانو د ډزو هدف وګرځېد او خپل ژوند یې له لاسه ورکړ.
د سرچینو په وینا، بریدګر په موټرسایکل سپاره وو او په نقیبالله باندې له ډزو وروسته له سیمې وتښتېدل. تر اوسه د دې برید انګېزه او د ترسره کوونکو هویت نه دی معلوم شوی.
دا پېښه په داسې حال کې رامنځته شوې چې د تخار ولایت اوسېدونکي په وروستیو اوونیو کې په دغه ولایت کې د وسلهوالو غلاوو او جنایي جرمونو له زیاتوالي اندېښمن دي.
تېره میاشت هم، د سرچینو په وینا، وسلوال کسانو د شپې ناوخته د تالقان ښار یوه سوپرمارکېټ ته ننووتل او د دغه دوکان له مالک څخه یې شاوخوا ۵۰ زره افغانۍ نغدې پیسې غلا کړې.
د طالبانو چارواکو تر اوسه د دې پېښې او د هغې د جزییاتو په اړه څه نه دي ویلي.
لیکواله:سلیمه آریایي
