د طالبانو د امر بالمعروف او نهی عن المنکر وزیر خالد حنفي په یوه ناسته کې د دې ډلې له محتسبانو سره وویل چې نړیواله ټولنه د افغانستان په کورنیو چارو کې د لاسوهنې حق نه لري. هغه ټینګار وکړ چې د ټولنې معنوي اصلاح د امر بالمعروف وزارت له اساسي مسؤلیتونو څخه ده او محتسبان هم په دې برخه کې ګډ او مهم رول لري.
د طالبانو د امر بالمعروف او نهی عن المنکر وزارت د پنجشنبې په ورځ، د غبرګولي ۲۸مه، د «اصلاحي، علمي او تربیوي محتسبانو» درې ورځنۍ ناستې د خالد حنفي د وینا ځینې برخې خپرې کړې. دغه ناسته د محتسبانو د روزنیزو، دیني او تربیوي پروګرامونو د ارزونې په موخه ترسره شوې ده.
خالد حنفي په خپلو خبرو کې وویل هغه اختلافات چې د هغه په وینا د «دین د دښمنانو» له خوا د افغانستان د خلکو ترمنځ رامنځته شوي وو، د طالبانو د واکمنۍ له راتګ وروسته له منځه تللي دي. هغه همدارنګه ادعا وکړه چې هغه کسان چې د ده په وینا د دې ډلې د یووالي او انسجام پر وړاندې ولاړ وو، خپلو موخو ته په رسېدو کې ناکام شوي دي.
د طالبانو د امر بالمعروف وزیر د محتسبانو د مسؤلیتونو په اړه وویل چې په ټولنه کې د دیني ارزښتونو خپرول د هغوی د ديني او رسمي دندو برخه ده. هغه له محتسبانو وغوښتل چې د لا زیات احساس د مسؤلیت، ژمنتیا او جديت سره د دې مأموریت د پلي کولو لپاره کار وکړي.
لیکواله:سلیمه آریایي
