د طالبانو د ۲۱۵ عزم قول اردو ویلي چې د هلمند ولایت د بهرامچې ولسوالۍ د رباط سیمې اړوندو سرحدي ځواکونو پاکستان ته د وسلو او مهماتو د قاچاق یوه هڅه شنډه کړې ده.
د یادې قول اردو د معلوماتو له مخې، ځواکونو د عملیاتو پر مهال ۵۰ میله کلاشینکوف ټوپکونه او ۱۵ زره د کلاشینکوف مرمۍ کشف او ضبط کړي او پاکستان ته یې د قاچاق مخه نیولې ده.
طالبانو ویلي چې په دې تړاو یې پلټنې پیل کړي دي، خو د نیول شویو کسانو او یا د قاچاق د شبکې په اړه یې نور جزیات نه دي ورکړي.
د طالبانو په وینا، سرحدي ځواکونه د وسلو، مهماتو او نورو ناقانونه توکو د قاچاق د مخنیوي لپاره خپلو هڅو ته دوام ورکوي.
لیکوال:سعید سمیر
