د هرات ولایت امنیې قومندانۍ د یوې وژنې د قضیې د کشف او د درېو شکمنو کسانو د نیولو خبر ورکړی دی. د چارواکو په وینا، دغه کسان د جنايي جرمونو پر ضد د مبارزې د مدیریت د ځواکونو له هر اړخیزو څېړنو وروسته پېژندل شوي او نیول شوي دي.
د لومړنیو معلوماتو له مخې، تورن کسان وژل شوی کس د چل او دوکې له لارې د امنیتي حوزې څلورم اړوند ګردهپارک سیمې ته بیولی، او هلته یې هغه ته د شړومبو سره ګډې د خوب ګولۍ ورکړي دي چې له امله بېهوشه شوی دی.
د چارواکو په وینا، تورنو کسانو وروسته له دې چې وژل شوی کس بېهوشه شوی،د موټر او نورو شتمنیو د غلا په نیت هغه وژلی او بیا یې مړی په پټه توګه ښخ کړی دی.
ډاکټر سید مسعود حسيني ویلي چې امنیتي ځواکونو د څېړنو له پیل وروسته د مړي د ښخولو ځای پیدا کړی او یو تورن یې نیولی دی. د هغه په وینا، دوه نور تورن کسان هم هغه مهال نیول شوي چې د نیمروز ولایت له لارې د هېواد د پرېښودو هڅه یې کوله او وروسته هرات ته لېږدول شوي دي.
هغه زیاته کړې چې تورنو کسانو د څېړنو پر مهال په دغه جرم اعتراف کړی او د قتل اصلي انګېزه یې د موټر او د وژل شوي کس د نورو مالونو غلا بللې ده.
د هرات امنیې قومندانۍ ویلي چې د تورنو کسانو دوسیه به د قانوني مراحلو له بشپړېدو وروسته عدلي او قضایي ارګانونو ته وسپارل شي.
لیکواله:سلیمه آریایي
