ځايي سرچینې وایي چې د بدخشان لپاره د طالبانو والي، د دې ډلې د کانونو رئیس او د «سیاهپوش» په نوم یوه ځانګړې قطعه د دغه ولایت د خواهان ولسوالۍ ته سفر کړی دی.
سرچینو د جمعې په ورځ، د چنګاښ پنځمه، ویلي چې دغه طالب چارواکي په داسې مهال خواهان ولسوالۍ ته رسېدلي چې هلته کړکېچونه زیات شوي او له خلکو او کانکیندونکو څخه د وسلو د راټولولو بهیر دوام لري.
دا په داسې حال کې ده چې سرچینو تر دې وړاندې د بدخشان ولایت د آوېز، پایانمور او آبګنده په کلیو کې د وسلو د راټولولو د عملیاتو د پیل خبر ورکړی و.
د سرچینو په وینا، طالبانو تر اوسه له کانکیندونکو او ځايي اوسېدونکو څخه شاوخوا اویا میله وسلې راټولې کړي دي.
په وروستیو ورځو کې، او هممهاله په بدخشان کې د کړکېچونو له زیاتېدو سره، د طالبانو د دفاع وزیر، ملا یعقوب مجاهد، هم دغه ولایت ته سفر کړی و.
طالبانو ویلي وو چې د دفاع وزیر د سفر موخه د واخان، اشکاشم او شغنان د سرحدي سیمو د امنیتي وضعیت ارزونه ده، خو ځینې سرچینې وایي چې ښایي دا سفر په بدخشان کې له وروستیو امنیتي تحولاتو او د کړکېچونو له زیاتېدو سره هم تړاو ولري.
طالبانو تر اوسه د بدخشان د والي، د طالبانو د کانونو د رئیس او د «سیاهپوش» په نوم د ځانګړې قطعې د خواهان ولسوالۍ د سفر او حضور په اړه په رسمي ډول څه نه دي ویلي.
لیکواله:سلیمه آریایي
