د طالبانو د ښار جوړونې او مسکن وزارت اعلان کړی چې د کابل ښار په کوټهسنګي سیمه کې به یو لوی جومات جوړ شي چې د شاوخوا ۱۸ تر ۲۰ زرو لمونځ کوونکو د ځایېدو ظرفیت به ولري. د دې وزارت په وینا، د دې پروژې لپاره ځانګړې شوې ساحه له ۵۵ زره مربع مترو څخه زیاته ده.
دغه وزارت د یکشنبې په ورځ، د غبرګولي ۳۱مه، په یوه خبرپاڼه کې ویلي چې د دې پروژې تخنیکي ارزونې بشپړې شوي او د جوړونې د راتلونکو پړاوونو لپاره زمینه برابره شوې ده.
په خپره شوې اعلامیه کې د دې جومات د احتمالي لګښت، مالي سرچینو او یا ځانګړې شوې بودیجې په اړه تر اوسه هېڅ جزئیات نه دي ورکړل شوي.
د خپرو شوو معلوماتو له مخې، دا جومات به د کابل ښار په یوه ګڼ مېشته سیمه کې جوړ شي.
د افغانستان د نږدې پنځه کلنې واکمنۍ په ترڅ کې، د بېلابېلو ولایتونو څخه د سلګونو جوماتونو د جوړېدو راپورونه خپاره شوي دي.
دا په داسې حال کې ده چې افغانستان لا هم د نړۍ له تر ټولو سختو بشري او اقتصادي بحرانونو سره مخ دی او میلیونونه خلک د خپل ژوند د لومړنیو اړتیاوو د پوره کولو لپاره بشري مرستو ته اړ دي.
په ورته وخت کې، د هېواد ډېر ښارونه د ښاري زېربناوو، معیاري عامه خدماتو او اساسي اسانتیاوو له کمښت سره مخ دي.
سره له دې چې د پراخې بېوزلۍ، بېکارۍ، د خوړو ناامنۍ او د بشري حقونو په اړه نړیوالو انتقادونو ته اشاره کېږي، د جوماتونو جوړول او پراختیا د طالبانو له اعلان شویو لومړیتوبونو څخه بلل کېږي.
نړیوال سازمانونه په خپلو وروستیو راپورونو کې په افغانستان کې د بې وزلۍ او د خوړو د ناامنۍ د زیاتېدو په اړه خبرداری ورکړی دی. د ملګرو ملتونو د پراختیايي پروګرام په یوه راپور کې ویل شوي چې په ۲۰۲۵ کال کې له هر څلورو کسانو څخه درې کسان په افغانستان کې د ژوند د اساسي اړتیاوو، په ګډون د کافي خوړو د برابرولو توان نه لري.
همدارنګه د نړیوال بانک اټکلونه ښيي چې د ۲۰۲۵ کال په وروستیو کې شاوخوا ۱۴ میلیونه کسان په افغانستان کې له سختې خوراکي ناامنۍ سره مخ وو او وړاندوینه کېږي چې دا شمېر به په راتلونکي ژمي کې ۱۷.۴ میلیونو کسانو ته ورسېږي، چې د هېواد د نفوس نږدې ۴۰ سلنه جوړوي.
لیکواله:سلیمه آریایي
