ایراني رسنیو راپور ورکړی چې د دوو کسانو د اعدام حکم د «بېلتون غوښتونکو ترهګریزو ډلو غړیتوب» او «د هېواد د امنیت ګډوډولو» په تور عملي شوی دی.
د میزان خبري اژانس د پنجشنبې په ورځ، د مې ۲۱مه، اعلان وکړ چې د «رامین زله» او «کریم معروفپور» د اعدام حکم نن سهار تطبیق شوی دی.
د راپور له مخې، دغه دوه کسان تورن وو چې د وسلهوالو ډلو په جوړولو او غړیتوب سره یې د هېواد د امنیت پر ضد فعالیتونه ترسره کړي دي.
په راپور کې راغلي چې د دغو کسانو د اعدام سزا د دار ځړولو له لارې عملي شوې ده. خو ایراني رسنیو د دې قضیې په تړاو د کومې مشخصې ډلې نوم نه دی اخیستی.
دا خبر په داسې حال کې خپرېږي چې د امریکا، اسراییل او ایران تر منځ د ۳۹ ورځنۍ جګړې وروسته، په ایران کې د اعدامونو د زیاتوالي راپورونه ورکول کېږي، په ځانګړي ډول د «جاسوسۍ»، «خیانت» او له «دښمن» سره د همکارۍ په تورونو.
لیکواله:سلیمه آریايي
