د امریکا او د ایران اسلامي جمهوریت ترمنځ د کړکېچونو له زیاتېدو سره هم مهاله، د امریکا سنا د پنجشنبې په ورځ، د زمري ۸مه، هغه طرحه رد کړه چې موخه یې د ډونالډ ټرمپ واکونه پر تهران د پوځي ځواک د کارولو په برخه کې محدودول وو.
دا طرحه د ۴۹ موافقو او ۵۰ مخالفو رایو په ترلاسه کولو سره تصویب نه شوه. دا په تېرو دوو اوونیو کې دویم ځل دی چې امریکايي سناتوران د «د جګړې د واکونو قانون» په استناد هڅه کوي د ټرمپ اداره د کانګرس له اجازې پرته د پوځي عملیاتو له پیل یا دوام څخه راوګرځوي.
د دغې طرحې له مخې، د امریکا حکومت به مکلف و چې هغه امریکايي ځواکونه له هر ډول پوځي ښکېلتیا څخه وباسي چې د کانګرس له تصویب پرته د ایران د اسلامي جمهوریت پر ضد ترسره شوي وي، مګر دا چې کانګرس په څرګند ډول د عملیاتو د دوام اجازه ورکړي.
په منځني ختیځ کې د کړکېچونو له زیاتېدو او د واشنګټن او تهران ترمنځ د تقابل له سختېدو وروسته، د پوځي ځواک د کارولو په برخه کې د امریکا د ولسمشر د واکونو محدودول یو ځل بیا د امریکا په کانګرس کې د بحث مهمه موضوع ګرځېدلې ده.
د دې طرحې ملاتړي وايي چې د امریکا د اساسي قانون له مخې، د جګړې د پیل پرېکړه باید د کانګرس په موافقه وشي او ولسمشر باید په یوازې ځان هېواد یوې پراخې پوځي جګړې ته داخل نه کړي.
په مقابل کې، د دې طرحې مخالفان، چې د جمهوري غوښتونکي ګوند یو شمېر سناتوران هم پکې شامل دي، استدلال کوي چې ولسمشر د وسلهوالو ځواکونو د اعلی قوماندان په توګه باید دومره واک ولري چې د امنیتي ګواښونو پر وړاندې ژر غبرګون وښيي او د امریکا د ملي ګټو دفاع وکړي.
دا رایه اچونه په داسې حال کې ترسره شوه چې د امریکا او د ایران د اسلامي جمهوریت ترمنځ په وروستیو ورځو کې یو ځل بیا کړکېچونه زیات شوي او د ولسمشر د پوځي واکونو د کارولو څرنګوالی د امریکا په کانګرس کې د بحث له مهمو موضوعاتو څخه ګرځېدلی دی.
لیکواله:سلیمه آریایي
