د بامیان ولایت د یکاولنګ ولسوالۍ څخه راپورونه وایي چې یو تنکی ځوان، محمدامین، د خپلې کم عمره خور د تښتولو د مخنیوي په هڅه کې وژل شوی دی.
د سیمهییزو سرچینو په وینا، پېښه دوه شپې وړاندې هغه مهال رامنځته شوه چې څلور تنه وسله وال کسان د یوې ۱۲ کلنې نجلۍ د تښتولو په نیت د هغوی کور ته ننوتل. ویل کېږي محمدامین د خپلې خور د ساتنې لپاره له بریدګرو سره مقاومت وکړ او د هغوی د موخې د شنډولو هڅه یې وکړه.
سرچینې زیاتوي چې نوموړی له وسله والو سره د مقابلې پر مهال سخت ټپي شو او وروسته یې ژوند له لاسه ورکړ. د راپورونو له مخې، د هغه مقاومت د دې لامل شو چې بریدګر خپلې موخې ته ونه رسېږي.
محمدامین د خپلې کورنۍ یوازینی زوی بلل شوی او د یوې بې وزلې کورنۍ د راتلونکي ستره هیله ګڼل کېده. د هغه وژل کېدو د سیمې اوسېدونکي ژور خپه کړي دي.
ځایي سرچینې ادعا کوي چې په وروستیو کلونو کې د ناامنۍ او قانوني تعقیب د کمزورۍ له امله یو شمېر جرمي مخینه لرونکي کسان په بېلابېلو سیمو کې د زورواکۍ او تاوتریخوالي اعمالو ته دوام ورکوي.
دا پېښه داسې مهال رامنځته کېږي چې په ورته وخت کې د کونړ ولایت په نرنګ ولسوالۍ کې هم یوه اته کلنه ماشومه د نامعلومو وسله والو له لوري په ډېر وحشیانه ډول وژل شوې ده، هغه موضوع چې د خلکو اندېښنې یې لا زیاتې کړې دي.
لیکوال:سعید سمیر
