مرسل اعطایي، یوه ځوانه نجلۍ او ښوونکې په بدخشان ولایت، بریالۍ شوې ده چې د دوو کلونو پرلهپسې هڅو وروسته د قرآن کریم یوه بشپړه نسخه په لاس ولیکي؛ دغه اقدام هغې د دې لپاره کړی دی چې اسلامي هنر ژوندی وساتي او معنوي خدمت ترسره کړي.
مرسل اعطایي د بدخشان ورځپاڼې سره په مرکه کې ویلي چې د دې کار اصلي هڅونکی دلیل یې د قرآن کریم سره مینه او د اسلامي هنر ساتنې علاقه وه، او تل یې هیله درلوده چې داسې اثر جوړ کړي چې هم عبادتي اړخ ولري او هم هنري ارزښت.
د هغې په خبره، د قرآن کریم د لاپه لیکنې پروسې شاوخوا دوه کاله وخت نیولی، او هغې زیاتره شپې، د ښوونې او شاګردانو د روزنې له پایته رسېدو وروسته، ورځنۍ دوه تر درې ساعته د آیتونو په لیکلو کار کاوه.
دغې ځوانې نجلۍ زیاته کړې چې د هر ډول تېروتنې د مخنیوي لپاره، هره پاڼه څو ځلې بیاکتنه کړې او لیکنې یې د قرآن کریم له اصلي متن سره پرتله کړي دي. هغې همدارنګه ویلي چې پلان لري دا په لاس لیکل شوې نسخه د تخنیکي ارزونې او ثبت لپاره د حج او اوقافو ریاست ته وړاندې کړي.
مرسل اعطایي وايي، سره له دې چې په هیڅ رسمي د لیکنې مرکز کې یې زده کړې نه دي کړي، خو د خپل شخصي خط او دیني مطالعاتو پر بنسټ یې توانېدلې چې دغه اثر بشپړ کړي.
هغې د عایشه صدیقه ښوونځي له ممتازو شاګردانو څخه وه او په دیني علومو او تجوید کې یې هم زده کړې کړې وې.
دغه ځوانه ښوونکې د زرګونو آیتونو بې تېروتنې لیکل له فني او روحاني اړخه یو لوی مسؤلیت ګڼي او زیاتوي چې د قرآن کتابت پر مهال یې د الله تعالی سره نږدې والی او معنوي سکون احساس کړی.
د هغې په خبره، د دې اثر د جوړولو لپاره یې د F4 کاغذ او بېلابېل رنګین قلمونه کارولي؛ داسې چې د آیتونو متن په تور رنګ، نښانونه په سره رنګ او د سورې ډیزاینونه په سره، تور او نیلي رنګونو کې ترسره شوي دي.
لیکواله:سلیمه حکیمي
