د افغانستان د شپږیزې کرېکټ لیګ د سیالیو په لومړۍ ورځ، امو نهنګانو او مس عینک اتلانو خپلې سیالې لوبډلې ماتې کړې.
په لومړۍ لوبه کې امو نهنګانو د سپین غر بازانو پر وړاندې د پچې تر ګټلو وروسته د توپ اچونې پرېکړه وکړه. سپین غر بازانو په ټاکلو ۲۰ اورونو کې د ۷ لوبغاړو په زیان ۱۶۷ منډې وکړې او امو نهنګانو ته یې د ۱۶۸ منډو هدف وټاکه.
امو نهنګانو دغه هدف د ۱۷.۲ اورونو په ترڅ کې د یوازې دوو لوبغاړو په سوځېدو بشپړ کړ او سپین غر بازانو ته یې د ۸ ویکټو په توپیر ماته ورکړه.
په دویمه لوبه کې بست ساتونکو د پچې تر ګټلو وروسته لومړی توپ وهنه وکړه او د ۷ لوبغاړو په زیان یې ۱۷۷ منډې جوړې کړې، چې د مس عینک اتلانو لپاره یې د ۱۷۸ منډو هدف وټاکه.
مس عینک اتلانو په زړه پورې تعقیب ترسره کړ او ټاکل شوی هدف یې د لوبې په وروستي اور کې د ۷ ویکټو له لاسه ورکولو سره پوره کړ، ترڅو بست ساتونکو ته د ۳ ویکټو په توپیر ماته ورکړي.
په دې توګه د شپږیزې لیګ لومړۍ ورځ د امو نهنګانو او مس عینک اتلانو په بریاوو پای ته ورسېده.
لیکوال:سعید سمیر
