د اتریش حکومت په پام کې لري چې له اوزبېکستان سره د یوې هوکړې په امضا کولو سره، د افغان پناه غوښتونکو د ایستلو لپاره نوې لاره پرانیزي. د اتریشي رسنیو په وینا، دغه هوکړه د غویي په۱۷ مه نېټه به د اتریش د کورنیو چارو او بهرنیو چارو وزیرانو له سفر سره اوزبېکستان ته هم مهاله امضا شي.
اتریشي ورځپاڼې «ډيپرسه» د چهارشنبې په ورځ راپور ورکړی چې د دې موافقې اصلي هدف د افغان پناه غوښتونکو اوزبېکستان ته لېږدول او بیا هغوی افغانستان ته بېرته ایستل دي. دغه طرحه د اتریش د مهاجرتي سیاستونو یوه برخه ده.
د اتریش کابینې مخکې د وري په ۱۹ د اوزبېکستان سره د دې موافقې طرحه تصویب کړې وه. دغه پرېکړه د پناه غوښتونکو د مدیریت او د هغوی د راستنېدو په اړه د کورنیو ارزونو په نتیجه کې ترسره شوې ده.
ګرهاړ کارنر، د اتریش د کورنیو چارو وزیر، دغه ګام د اتریش د سختو مهاجرتي سیاستونو یوه برخه بللې ده. هغه ټینګار کړی چې اتریش به د دې هوکړې په عملي کولو سره د پناه غوښتونکو د ایستلو بهیر زیات کړي.
د راپورونو له مخې، اتریش له تېر کال راهیسې څو افغانان له دې هېواد څخه ایستلي دي: دغه بهیر به د دې نوې هوکړې په عملي کولو سره پراخ شي.
