د طالبانو د المپیک، بدني روزنې او سپورټ عمومي ریاست وایي، په بغلان ولایت کې د «یو اېف سي» رزمي سبک سیالۍ د اوو ولایتونو د ۸۰ ورزشکارانو په ګډون ترسره شوې چې په پایله کې د کوربه بغلان لوبغاړو د اتلولۍ جام خپل کړ.
د یاد ریاست د خبرپاڼې له مخې، دغه یو ورځنۍ سیالۍ د «یو اېف سي» رزمي سبک د فدراسیون د استازولۍ او د بغلان د بدني روزنې او سپورټ آمریت په ګډه همکارۍ د بغلان ولایت په مرکز کې ترسره شوې.
خبرپاڼه زیاتوي چې په دغو سیالیو کې د بغلان، بلخ، کندز او د هېواد د نورو ولایتونو په ګډون د اوو ولایتونو ۸۰ ورزشکارانو ګډون کړی و.
د سیالیو په پای کې د بغلان لوبغاړو لومړی مقام او د اتلولۍ جام وګاټه، د کندز ورزشکارانو دویم او د بلخ لوبغاړو درېیم مقام خپل کړ.
د طالبانو د المپیک، بدني روزنې او سپورټ عمومي ریاست ویلي، د دغو سیالیو موخه د رزمي ورزشونو پراختیا، د ورزشکارانو د وړتیاوو لوړول او د ولایتونو ترمنځ د سیالیو پیاوړتیا ده.
لیکوال:سعید سمیر
