رویټرز راپور ورکړی چې په لبنان کې د اسرائیل او حزبالله ترمنځ د اوربند له ټینګېدو سره هم مهاله، د امریکا د متحده ایالاتو ځانګړی استازی سټیو وټکاف او د ایران د اسلامي جمهوریت د بهرنیو چارو وزیر عباس عراقچي سویس ته روان شوي دي. دا دیپلوماټیک خوځښتونه ښایي د دواړو لورو ترمنځ د تخنیکي خبرو اترو د پیل زمینه برابره کړي، څو موجود تفاهم په یوه دایمي هوکړه بدل شي.
د راپور له مخې، سټیو وټکاف سویس ته سفر کړی څو د امریکا د ولسمشر زوم جېرډ کوشنر سره یوځای شي، چې له وړاندې په دغه هېواد کې حضور لري. تر اوسه د احتمالي لیدنو او خبرو اترو د پروګرام په اړه نور جزیات نه دي خپاره شوي.
رویټرز همدارنګه لیکلي چې د ایران د اسلامي جمهوریت د بهرنیو چارو وزیر عباس عراقچي ټاکل شوې د شنبې په ورځ سویس ته سفر وکړي. د دې خبري آژانس په وینا، په سویس کې د دواړو هېوادونو د چارواکو هم مهاله حضور ښایي د تهران او واشنګټن ترمنځ د یوې دوامدارې هوکړې د ترلاسه کولو لپاره د تخنیکي مذاکراتو د پیل نښه وي.
دا پرمختګونه د اسرائیل او حزبالله ترمنځ په لبنان کې د اوربند له ټینګېدو وروسته رامنځته شوي دي؛ هغه اوربند چې د وروستیو تاوتریخوالو او نښتو له زیاتېدو وروسته نافذ شو. د شنونکو په باور، دا وضعیت کولای شي د ایران او امریکا ترمنځ د ديپلوماټیکو هڅو د دوام لپاره مناسبه فضا رامنځته کړي.
د راپور پر بنسټ، هغه تفاهم چې د روانې اوونۍ په پیل کې لاسلیک شوی، د جګړو درول او د شپېتو ورځو یوه دوره په پام کې نیسي، څو د ایران د اټومي پروګرام او د دواړو خواوو ترمنځ د نورو اختلافاتي موضوعاتو په اړه خبرې وشي.
رویټرز زیاته کړې چې که اوسنی بهیر همداسې دوام ومومي، نو تخنیکي مذاکرات به د ایران او امریکا ترمنځ د یوې هر اړخیزې او دایمي هوکړې د ترلاسه کولو لپاره لومړنی مهم ګام وي.
لیکواله:سلیمه آریایي
