د طالبانو د فراه ولایت والي د افغانستان او ایران ترمنځ د سوداګرۍ د پیاوړتیا لپاره د سرحدي لارو د ۲۴ ساعته پرانیستې غوښتنه کړې ده.
نوموړي ویلي، چې د دواړو هېوادونو ترمنځ د سوداګریزو اړیکو د پراختیا لپاره اړتیا ده چې سرحدي لارې شپه او ورځ فعاله وساتل شي، څو د توکو لېږد رالېږد چټک او اسانه شي.
هغه همدارنګه د سرحدي تجهیزاتو پر نوي کولو ټینګار کړی او ویلي یې دي چې د عصري امکاناتو په برابرېدو سره به د تګ راتګ بهیر لا خوندي او منظم شي.
د فراه والي په باور، دا اقدامات کولی شي د سوداګرۍ حجم لوړ کړي او د دواړو هېوادونو اقتصادي اړیکې لا پیاوړې کړي.
لیکوال:سعید سمیر
