فېروز کندوزي، د افغانستان د شمال یو پېژندل شوی هنرمند، د طالبانو د امر بالمعروف او نهي عن المنکر محتسیبینو له لوري نیول شوی او وروسته له یوې شرايطې آزاد شوی دی. ځايي منابعو د یکشنبې په ورځ ویلي چې دغه هنرمند څو ساعته په توقیف کې پاتې شوی و.
د دې سرچینو له مخې، د آزادۍ وروسته طالبانو له هغه څخه غوښتنه کړې چې د موسیقۍ فعالیتونه ودروي. ویل کېږي چې د هغه آزادۍ مشروطه وه چې موسیقي پرېږدي، که څه هم دا موضوع تر اوسه په رسمي توګه نه ده تایید شوې.
تر اوسه پورې د طالبانو چارواکو په دې اړه کوم رسمي ځواب یا وضاحت نه دی ورکړی. دا پېښه د هغو محدودیتونو په لړ کې راپورته کېږي چې په تېرو میاشتو کې د هېواد په بېلابیلو برخو کې د هنري فعالیتونو، په ځانګړي ډول موسیقۍ، باندې لګېدلي دي.
طالبان موسیقي د خپلو دینی احکامو پر بنسټ حرام ګڼي، او په وروستیو میاشتو کې ګڼ شمېر راپورونه د موسیقي پروګرامونو بندولو، ځینې هنري مرکزونه بندولو او هنرمندانو سره د مخامخ کیدو په اړه خپاره شوي دي. کلتوري فعالان وایي چې دا وضعیت د هنري فعالیتونو په کمښت سبب شوی او ډیری هنرمندان یا خپل فعالیتونه بند کړي دي یا یې هیواد پریښی دی.
لیکواله:سلیمه آریایي
