جرمني یو ځل بیا د لیپزیګ/هاله هوايي ډګر له لارې شاوخوا ۳۰ افغان پناه غوښتونکي په یوه چارټر الوتکه کې کابل ته لېږلي دي. د جرمني چارواکو په وینا، دا اقدام د طالبانو له ادارې سره په همغږۍ ترسره شوی او ټول لېږل شوي کسان نارینه دي.
د چارواکو د معلوماتو له مخې، په دغې الوتنه کې هغه افغانان شامل وو چې د جرمني بېلابېلو فدرالي ایالتونو د اخراج لپاره معرفي کړي وو. ویل کېږي، په دې کسانو کې ځینې د جنسي تېري، وژنې او جنسي ځورونې په څېر جرمونو له امله محکوم شوي وو.
دغه کسان د شمالي راین ـ ویستفالن، شلېزویګ ـ هولشتاین، بایرن، نیدرزاکسن او بادن ـ وورتمبرګ ایالتونو څخه راټول شوي وو. الوتکه د شپې له خوا د لیپزیګ/هاله هوايي ډګر څخه د کابل پر لور روانه شوې ده.
په همدې حال کې، د هوايي ډګر په ترمینل کې شاوخوا ۳۵ کسان د دې اقدام پر ضد د اعتراض لپاره راټول شوي وو.
د راپورونو له مخې، د دې اخراج حقوقي او اداري بنسټ د جرمني حکومت او طالبانو ترمنځ هغه هوکړه ده چې له مخې یې جرمني کولای شي د کوم منځګړي هېواد له اړتیا پرته افغان پناه غوښتونکي په مستقیم ډول افغانستان ته ولېږي.
جرمني د روان کال په اپرېل میاشت کې هم د یوې چارټر الوتنې له لارې ۲۵ افغان پناه غوښتونکي کابل ته استولي وو. تر دې وړاندې په ۲۰۲۴ کال کې هم ۲۸ افغان نارینه د قطر په مرسته له لیپزیګ څخه کابل ته شړل شوي وو، خو وروسته جرمني په خپلواکه توګه انفرادي او ډلهییزې شړنې پیل کړې.
منتقدین وایي، جرمني له یوې خوا طالبان د بشري حقونو د سرغړونو له امله په رسمیت نه پېژني، خو له بلې خوا د عملي اړتیاوو لپاره ورسره تخنیکي او سیاسي تعامل کوي. د افغانستان د سفارتونو لپاره د طالبانو د محدودو دیپلوماټانو منل هم د همدې تعامل یوه برخه بلل کېږي.
د جرمني د کورنیو چارو وزیر، الکساندر ډوبرېنډټ، ویلي چې لومړیتوب به هغو کسانو ته ورکول کېږي چې مجرمین یا امنیتي ګواښ ګڼل کېږي، خو نوموړي زیاته کړې چې د اخراج دا لړۍ ښايي په راتلونکي کې نوره هم پراخه شي.
لیکوال:سعید سمیر
