د ایران جګړې له امله پېښ شوې بدلونونه، د منځني ختیځ د سیمهییزو برابریو تر بدلون پرته، له تمې څخه بهرې پایلې هم لرلې؛ د بېلګې په توګه د امنیتي اقداماتو زیاتوالی چې د نړیوالو منل شویو جرمونو له یوې پېژندل شوې څېرې د نیولو سبب شو.
په همدې چوکاټ کې، ډانیل کینهان، یو ایرلنډي اتباع چې کلونه یې د جرمونو په شبکو کې د یوه کلیدي غړي په توګه پېژندل شوی و، د اپریل میاشتې په منځ کې په متحده عربي اماراتو په دوبۍ ښار کې ونیول شو. دا اقدام په داسې وخت کې ترسره شو چې د سیمې د بېثباتۍ څخه د جرمونو د ډلو د ناوړه استفادې په اړه اندېښنې زیاتې شوې وې.
د ۲۰۲۲ کال د اپریل په میاشت کې، د امریکا متحده ایالاتو حکومت د کینهان او د هغه د کورنۍ ځینو غړو پر وړاندې بندیزونه ولګول او دوی یې د «کینهان کارتل» مشران وبلل؛ هغه شبکه چې راپورونه یې د مخدره موادو، وسلو قاچاق او تاوتریخوالي کړنو، لکه وژنو سره تړلې ښيي.
د امریکا د مالیې وزارت او د اروپا د قانون پلي کولو ادارو په وینا، ډانیل کینهان د اروپا په سازمانیافته جرمونو کې له تر ټولو اغېزمنو څېرو شمېرل کېږي. هغه همدارنګه د یوې مدیریتي کمپنۍ له لارې چې اوس یې فعالیت پای ته رسېدلی، د مسلکي سپورټ نړۍ سره اړیکې لرلې او له ۱۰۰ څخه زیات بوکسورانو، په شمول د ټایسون فیوري او کارل فرامپټن، سره یې همکاري کړې وه.
د نیکولا تالنټ په وینا، چې د سازمان شویو جرمونو په برخه کې تحقیقي خبریال دی، د کینهان نیول دې شبکې ته یوه مهمه ضربه ده، که څه هم یوازې دا د هغې د ویجاړیدو معنی نه لري. هغه ټینګار وکړ چې دغه کارتل پراخ جوړښت او د پام وړ مالي سرچینې لري او احتمال لري نور کسان د هغې د مشرۍ د دوام لپاره چمتو وي.
د ایرلنډ پولیسو هم په یوه بیان کې ویلي چې دغه نیونه د نړیوالې همکارۍ اهمیت د سازمان شویو جرمونو پر وړاندې څرګندوي، ترڅو له فراملي سازمان شویو جرمونو سره مبارزه وشي. دا عملیات وروسته له هغه ترسره شول چې ایرلنډي چارواکو د کینهان د احتمالي رول په اړه قضایي دوسیه د یو نړیوالې جنایي شبکې په تړاو اماراتو ته واستوله.
د راپورونو له مخې، د دوبۍ څارنوالۍ د دې دوسیې پر بنسټ د هغه د نیولو حکم صادر کړی او د استرداد قانوني بهیر یې پیل کړی دی. ډانیل کینهان لږ تر لږه ۴۸ ساعتونو کې د حکم له صدور وروسته ونیول شو.
د ایرلنډ پولیسو هم ویلي چې دا بهیر د ایرلنډ او متحده عربي اماراتو ترمنځ د دوه اړخیز استرداد د تړون په چوکاټ کې ترسره شوی؛ هغه تړون چې د سازمان شویو جرمونو پر وړاندې د ګډو عملیاتو په تطبیق کې مهم رول لري.
لیکواله:سلیمه آریایي
