د طالبانو د علماوو شورا مشر په کابل کې په خپلو تازه څرګندونو کې د ښځو او نجونو هر ډول زدهکړه «په مطلق ډول حرامه» بللې او ویلي یې دي چې ښځې باید په هېڅ ډول ښوونیزو مرکزونو کې حضور ونه لري. هغه ټینګار کړی چې دا بندیز د دیني مدرسو په ګډون پر ټولو تعلیمي ادارو پلي کېږي او د ښځو لپاره په هېڅ کچه زدهکړه روا نه ده.
د خپرې شوې غږیزې ثبت شوې وینا له مخې، دغه طالب چارواکي عصري علوم، لکه ساینس او ټکنالوژي، هم «بې ګټې علم» بللي او د نجونو او ښځو پر زدهکړو یې د بشپړ بندیز غوښتنه کړې ده. دا څرګندونې داسې مهال مطرح کېږي چې په افغانستان کې د زدهکړو محدودیتونه لا هم دوام لري.
طالبانو د ۲۰۲۱ کال په اګست کې له بیا واکمنېدو وروسته د ښځو او نجونو پر تعلیم او تحصیل پراخ بندیزونه ولګول. اوس مهال له شپږم ټولګي پورته نجونې له زدهکړو محرومې دي او پوهنتونونه هم د ښځو پر مخ تړلي پاتې دي.
د ښځو د زدهکړو په اړه د طالبانو تعلیمي تګلارې په تېرو څه باندې درېیو کلونو کې له پراخو کورنیو او نړیوالو غبرګونونو او نیوکو سره مخ شوي دي. د بشري حقونو سازمانونو، تعلیمي بنسټونو او د نړۍ یو شمېر هېوادونو په وار وار د دغو محدودیتونو د لغوه کېدو او د نجونو او ښځو پر مخ د ښوونیزو مرکزونو د بیا پرانیستلو غوښتنه کړې ده.
کارپوهان خبرداری ورکوي چې د دغو محدودیتونو دوام کولای شي د افغانستان لپاره پراخې ټولنیزې، اقتصادي او بشري پایلې ولري او د میلیونونو نجونو او ښځو د زدهکړو فرصتونه لا ډېر محدود کړي.
لیکواله:سلیمه آریایي
