د طالبانو د عدلیې وزارت د یوه سند له مخې، د دې ډلې مشر هبتالله اخوندزاده په نوي شفاهي حکم کې پر ټولو طالبانو او دولتي کارکوونکو د ځیرکو موبایلونو کارول بند کړي دي. په سند کې راغلي چې له دې امر څخه سرغړوونکي کسان به مجرمین وبلل شي او قانوني تعقیب به یې وشي.
د یاد حکم له مخې، هغه کسان چې د ځیرکو موبایلونو د کارولو له بندیز څخه سرغړونه وکړي، نظامي محاکمو ته به معرفي کېږي.
په سند کې ویل شوي چې دا پرېکړه د طالبانو د سترې محکمې د نظامي معاونیت اړوند د اتو زونونو د نظامي محاکمو رییسانو ته د امنیه قوماندانانو او د استخباراتو د رییسانو په حضور کې ابلاغ شوې ده.
د ترلاسه شویو معلوماتو له مخې، د اتو زونونو د نظامي محاکمو رییسان مکلف شوي چې د دغه حکم د عملي کېدو په اړه د طالبانو مشرتابه ته ډاډ ورکړي.
لیکوال:سعید سمیر
