د حوثیانو ویاند، محمد عبدالسلام، د صنعا پر نړیوال هوایي ډګر له برید وروسته په یوه اعلامیه کې سعودي عربستان د یمن پر دوامدارې محاصرې تورن کړ. هغه وویل دا برید ښيي چې د صنعا هوایي ډګر بیا پرانیستل تر اوسه د سعودي چارواکو پر پرېکړې پورې تړلي دي.
عبدالسلام همدارنګ څرګنده کړه چې سعودي عربستان، د یمن د حاکمیت د ملاتړ په اړه د اعلامیو له خپرولو سره سره، په عمل کې داسې کړنلاره پر مخ وړي چې د هغه په وینا د هغې طریقې شبیه ده چې اسرائیل یې د خپلو جګړو پر مهال کاروي.
د حوثیانو ویاند په دوام کې، سعودي عربستان په دروغ ویلو، ځان غوره ګڼلو، دښمنۍ او د یرغلیزو اقداماتو په ترسره کولو تورن کړ. هغه ادعا وکړه چې د یمن په اړه د ریاض پالیسۍ تر اوسه پر فشار او مقابلې ولاړې دي.
عبدالسلام دا هم وویل چې د یمن محاصره د سعودي عربستان په ملاتړ دوام لري او دا هېواد له هغه څه وروسته چې ده په ۸ کلنه جګړه کې ناکامي وبلله، اوس هڅه کوي د اقتصادي فشارونو له لارې خپلو موخو ته ورسېږي.
هغه خبرداری ورکړ چې سعودي عربستان په ناسمې محاسبې سره، ځان د یمن په ښکاره دښمن بدل کړی او د دې کړنلارې دوام کولای شي د دغه هېواد د امنیت او اقتصاد لپاره جدي پایلې ولري.
عبدالسلام په پای کې ټینګار وکړ چې سمندري محاصره د محاصرې او بالمثله ځواب ترمنځ په مخامخ کېدو کې یوازې لومړی ګام دی او د یمن خلک به، د هغه په وینا، خپلو حقوقو ته د رسېدو لپاره له هرې ارزي او اړینې وسيلې کار واخلي.
لیکواله:سلیمه آریایي
