لیونل مېسي د خپل پلار، خورخه مېسي، له مړینې وروسته خپل فوټبالي فعالیتونه تر نامعلومې مودې پورې ځنډولي دي. خورخه مېسي له څو کلونو ناروغۍ سره له مبارزې وروسته، د ۶۸ کلونو په عمر په روساریو ښار کې په یوه کلینیک کې وفات شو؛ هغه پېښه چې د ارجنټاین د فوټبال ستوري او د هغه د کورنۍ لپاره ستره ضایعه بلل کېږي.
فوت مرکاتو د ارجنټایني سرچینو په حواله راپور ورکړی چې د اته بالون ډياورونو ګټونکي خپل مسلکي فعالیتونه درولي، څو په دې سخت پړاو کې د خپلې کورنۍ او نږدې کسانو تر څنګ پاتې شي. د راپور له مخې، مېسي تر اوسه انټر میامي ته د بېرته ستنېدو لپاره کومه مشخصه نېټه نه ده ټاکلې او په اوسنیو شرایطو کې فوټبال د هغه اصلي لومړیتوب نه دی.
خورخه مېسي د لیونل لپاره یوازې پلار نه و، بلکې د هغه د مسلکي فعالیتونو له لومړیو کلونو راهیسې یې د سلاکار، د پروګرامونو د مدیر او د هغه د یوه له مهمو ملاتړو په توګه هم رول درلود. دا ملګرتیا د نیولز اولډ بویز کلب کې د مېسي له وخت څخه پیل شوه او هسپانیې ته د هغه له انتقال وروسته هم دوام وکړ.
خورخه د خپل زوی د مسلکي ژوند په مسیر کې ډېرې قربانۍ ورکړې او د هغه د شخصي ژوند او فوټبالي مسلک په ډېرو مهمو پرېکړو کې یې ونډه لرله. له هغو لومړنیو کلونو څخه چې مېسي د فوټبال په ډګر کې وده کوله، تر هغه وخته چې د فوټبال په تاریخ کې د یو له تر ټولو بریالیو لوبغاړو څخه شو، د خورخه د پردې تر شا رول تل د پام وړ و.
راپورونه ښيي چې د امریکا د نړیوال جام پر مهال د خورخه مېسي روغتیا د کورنۍ د اندېښنې لامل شوې وه. د مېسي شخصي شرایطو، د سیالیو له فشار او له کورنۍ څخه د واټن ترڅنګ، پر هغه ژوره اغېزه کړې وه او هغه مهال یې هم څو ځله د کورنۍ د اهمیت او د خپل پلار د روغتیا په اړه خبرې کړې وې.
وروسته له هغې چې مېسي د خپل پلار له مړینې خبر شو، له انټر میامي سره یې خپل فعالیتونه ودرول او ارجنټاین ته ستون شو، څو له خپلې کورنۍ سره یوځای وي. د خورخه مېسي د جنازې مراسم په روساریو کې په خصوصي ډول ترسره شول او له هغې وروسته لیونل مېسي غوره کړې چې د خپلو نږدې کسانو تر څنګ پاتې شي.
د خپرو شویو راپورونو له مخې، کورنۍ اوس مهال د مېسي تر ټولو مهم لومړیتوب دی او هغه د خپلې مور، خویندو او وروڼو، مېرمنې او اولادونو ملاتړ له ځان سره لري. همداراز داسې راپورونه خپاره شوي چې ښايي د ارجنټاین د ملي لوبډلې ځینې هملوبغاړي، لکه لیاندرو پاردس، نیکولاس اوتامندي او انخل ديماریا، له نوموړي سره لیدنه وکړي.
په همدې حال کې، د مېسي د مسلکي راتلونکي په اړه پوښتنې هم راپورته شوي دي. ارجنټایني رسنیو د هغه د فعالیتونو د دوام یا ځنډ په اړه اټکلونه کړي، خو تر اوسه د هغه د تقاعد یا لوبغالو ته د بېرته ستنېدو د دقیقې نېټې په اړه هېڅ رسمي اعلان نه دی شوی.
مېسي چې ۳۹ کلنۍ ته نږدې کېږي، د خپل مسلک په یوه متفاوت پړاو کې دی؛ داسې پړاو چې شخصي مسایل تر بل هر وخت ډېر د هغه پر پرېکړو اغېز کوي. سره له دې چې هغه خپل فوټبالي فعالیتونه تر نامعلومې مودې ځنډولي، لا هم په ډاډ سره نه شي ویل کېدای چې نوموړی غواړي د تل لپاره له فوټبال څخه لاس واخلي.
دغه لوبغاړی، چې له دوو لسیزو ډېر وخت یې د فوټبال په لوړه کچه تېر کړی، اوس د خپلې کورنۍ تر څنګ د پاتې کېدو او د غم د زغملو لپاره اړین وخت لري. په فوټبال کې د هغه د راتلونکي او انټر میامي ته د بېرته ستنېدو په اړه پرېکړه به وروسته، د دې شخصي پړاو له تېرېدو وروسته، وشي.
لیکواله:سلیمه آریایي
