په کابل کې د پاکستان سفیر عبیدالرحمن نظاماني له طالبانو غوښتي، چې د افغانستان له خاورې د راپورته کېدونکو «ترهګریزو ګواښونو» پر ضد عملي اقدامات وکړي.
نوموړي دغه څرګندونې له هند سره د پاکستان د جګړې د کال پوره کېدو په مناسبت جوړې شوې غونډې ته کړي دي. هغه ویلي، پاکستان د سولې غوښتونکی دی، خو دا هیله باید د کمزورۍ په معنا تعبیر نه شي.
په کابل کې د پاکستان سفارت د اعلامیې له مخې، نظاماني ویلي چې اسلاماباد له افغانستان سره د ورورولۍ اړیکو ته ژمن دی، خو د افغانستان له خاورې د پاکستان پر ضد د راپورته کېدونکو ګواښونو د مخنیوي لپاره باید جدي او عملي ګامونه واخیستل شي.
طالبانو تر اوسه د دغو څرګندونو په اړه څه نه دي ویلي.
لیکوال:سعید سمیر
