د بدخشان ولایت د یفتل پایین ولسوالۍ اوسېدونکو د شنبې په ورځ د هغه څه پر ضد چې د طالبانو «ظلم او زیاتی» یې وباله، اعتراضیه لاریون وکړ. د سیمې د اوسېدونکو په وینا، دغه اعتراض وروسته له هغې پیل شو چې د یفتل په بازار کې یوه پېښه رامنځته شوه.
د اوسېدونکو په وینا، د طالبانو ځواکونو د یفتل په بازار کې یوه ښځه بدني تلاشي کړه. معترضانو دغه اقدام د اعتراضونو اصلي لامل بللی او پر وړاندې یې سخت غبرګون ښودلی دی.
د راپورونو له مخې، طالبانو د اعتراض کوونکو د خپرولو لپاره ډزې کړي. د دې خبر تر خپرېدو پورې د احتمالي ټپیانو یا نیول شویو کسانو د شمېر په اړه کره معلومات نه دي خپاره شوي.
طالبانو هم تر اوسه د دې پېښې او د یفتل پایین ولسوالۍ د اوسېدونکو د ادعاوو په اړه په رسمي ډول څه نه دي ویلي.
لیکواله:سلیمه آریایي
