یو شمېر افغان کډوالو چې په ایران کې مېشت دي، د چهارشنبې په ورځ په تهران کې د طالبانو تر کنټرول لاندې د افغانستان سفارت مخې ته راټول شول او د هرات د وروستیو ولسي لاریونونو ملاتړ یې اعلان کړ.
د دې غونډې ګډونوالو د «کار، زدهکړې او ازادۍ» په څېر شعارونه ورکول او د افغانستان د خلکو غوښتنو ته د پاملرنې غوښتنه یې کوله.
لاریون کوونکو همدارنګه داسې پلاکارډونه له ځان سره لېږدول چې د هرات د ولسي لاریونونو ملاتړ یې څرګنداوه. په یوه پلاکارډ کې لیکل شوي وو: «د عزت سند د هرات د جبرئیل سیمې د ځوانانو پاکه وینه ده.»
د هغو ویډیوګانو له مخې چې رسنیو ته رسېدلي، د دې غونډې یوه ګډونوال له خلکو وغوښتل چې د افغان ښځو او د افغانستان د خلکو ترڅنګ ودرېږي او پرې نه ږدي چې د قربانیانو وینه هېره او بې ارزښته شي.
دا غونډه یوه ورځ وروسته له هغې ترسره شوه چې د هرات په جبرئیل سیمه کې ولسي لاریونونه وشول. د راپورونو له مخې، دغه لاریونونه د طالبانو د ځواکونو له لوري له مداخلې او ځپنې سره مخ شوي وو.
د هرات وروستیو پېښو د هېواد دننه او بهر د یو شمېر فعالانو، سیاستوالو او افغان کډوالو غبرګونونه راپارولي دي. هغوی د لاریون کوونکو او نیول شویو کسانو د وضعیت د څېړنې او ورته د رسېدنې غوښتنه کړې ده.
لیکواله:سلیمه آریایي
