په بدخشان ولایت کې سیمه ییزو سرچینو راپور ورکړی چې تېره ورځ ماښام په وردوج ولسوالۍ کې د طالبانو ډلې د پوځ د رئیس ارکان قاري فصیح الدین پر کور د وسله والو کسانو لخوا برید شوی دی. د دغو سرچینو په وینا، دا پېښه په "استرپ" کلي کې شوې او بریدګرو له شاوخوا لوړو سیمو څخه ډزې کړي دي.
د سرچینو د معلوماتو له مخې، وسله والو کسانو د پیکا وسلې په کارولو سره د قاري فصیح الدین پر کور ډزې کړي دي. له دې سره سره، تر اوسه د دغې پېښې د څرنګوالي یا ممکنه زیانونو په اړه نور تفصیلي جزییات نه دي خپاره شوي.
د دې خبر تر خپرېدو پورې، د دغه برید له امله د اوښتې مرګ ژوبلې یا مالي زیانونو په اړه کوم راپور نه دی خپور شوی. همدارنګه د طالبانو د حکومت چارواکو تر اوسه د دې راپور په اړه رسمي غبرګون نه دی ښودلی او د بریدګرو هویت یا د برید انګېزه هم نه ده روښانه شوې.
دا پېښه په داسې حال کې راپور کېږي چې په وروستیو اونیو کې د بدخشان ولایت په ځینو برخو کې د طالبانو د مخالفو ډلو د نښتو او بریدونو د زیاتېدو راپورونه خپاره شوي دي.
لیکواله:سلیمه آریایي
