یو سویډنی سیلانی، چې له اروپا څخه په بایسکل افغانستان ته تللی، وايي په راتلونکو اونیو کې به د بدخشان واخان دهلېز ته هم د بایسکل په وسیله سفر وکړي.
هدفین، چې دوه اونۍ وړاندې افغانستان ته رسېدلی، ویلي غواړي د واخان سخت او غرنی مسیر هم په بایسکل ووهي.
هغه د طالبانو اړوند رسنیو ته ویلي، افغانستان د طبیعي ښکلاوو هېواد دی او غرونه، شنې درې او ښکلې هوا یې د کورنیو او بهرنیو سیلانیانو لپاره ځانګړی جذابیت لري.
د بدخشان د شهر بزرگ ولسوالۍ، چې د واخان پر لور د تګ له مهمو سیمو څخه ده، په وروستیو کې د ګڼ شمېر کورنیو او بهرنیو سیلانیانو پام ځان ته اړولی دی. د معلوماتو له مخې، دغه ولسوالۍ هره ورځ د سلګونو سیلانیانو کوربه وي.
لیکوال:سعید سمیر
