د متحده ایالاتو د دفاع وزارت (پنټاګون) ځینې برخې وروسته له هغې په موقتي ډول تخلیه او ځینو ساحو ته لاسرسی محدود شو، چې د دې مرکز د هوا د سیستم په اړه یو شکمن وضعیت وپېژندل شو.
د لومړنیو راپورونو له مخې، دا حالت هغه وخت رامنځته شو کله چې د پنټاګون د هوایي کنډېشن له سیستم څخه یو غیرعادي بوی خپور شو، چې له امله یې په ودانۍ کې اضطراري او امنیتي تدابیر فعال شول.
له دې پېښې وروسته، د خطرناکو موادو پر ضد ځانګړي ټیمونه او امنیتي ځواکونه د وضعیت د څېړنې او د کارکوونکو د خوندیتوب د ډاډ ترلاسه کولو لپاره ځای ته ولېږل شول. همدارنګه د ودانۍ څو پوړونه او دهلېزونه په موقتي ډول بند کړل شول.
د پنټاګون چارواکو وویل چې د ودانۍ د څارنې سیستمونو د هوا د کیفیت د خرابوالي نښې ثبت کړې وې، له همدې امله له کارکوونکو غوښتل شوي وو چې د څېړنو تر بشپړېدو پورې په خوندي ځایونو کې پاتې شي.
د فني ارزونو او دوامدارو څېړنو وروسته، متخصصو ټیمونو هېڅ ډول خطرناک مواد یا رښتینی ګواښ په ودانۍ کې ونه موند، او څرګنده شوه چې لومړنی خبرداری د هوا د سیستم د یوه غیرعادي حالت له امله رامنځته شوی و.
له څېړنو وروسته، مسؤلو چارواکو اعلان وکړ چې په پنټاګون کې هېڅ امنیتي یا کیمیاوي خطر نشته او د ودانۍ وضعیت بېرته عادي حالت ته ستون شوی دی.
که څه هم دا پېښه د یوه غلط الارم په توګه ارزول شوې، خو بیا یې هم د متحده ایالاتو په یو له مهمو پوځي مرکزونو کې پراخ احتیاطي او امنیتي تدابیر فعال کړل.
لیکواله:سلیمه آریایي
