د طالبانو مخالفې ډلې، ملي مقاومت جبهې، ادعا کړې چې ځواکونو یې د کابل ښار په پنځمه امنیتي حوزه کې په یوه هدفمند برید کې درې طالبان وژلي او یو بل یې ټپي کړی دی.
د دغې جبهې د خبرپاڼې له مخې، برید د یکشنبې په ماښام د غبرګولي ۲۴مه د کابل د سیلو سړک په سیمه کې ترسره شوی دی. خبرپاڼه زیاتوي چې برید د ماښام شاوخوا اووه بجې شوی او په پایله کې یې د طالبانو یو پوځي موټر هم په بشپړه توګه ویجاړ شوی دی.
مقاومت جبهې ویلي چې په دغه برید کې ملکي وګړو او د دوی ځواکونو ته هېڅ ډول زیان نه دی اوښتی. دغې ډلې ټینګار کړی چې د هېواد په بېلابېلو سیمو کې به د طالبانو پر وړاندې خپلو هدفي بریدونو ته دوام ورکړي.
بل لور ته، د طالبانو سیمهییزو چارواکو تر اوسه د یاد برید او د مقاومت جبهې د ادعاوو په اړه رسمي غبرګون نه دی ښودلی.
دا په داسې حال کې ده چې باوري سرچینو ویلي، د ایران اسلامي جمهوریت په وروستیو اونیو کې په ایران کې د ملي مقاومت جبهې پر غړو فشارونه زیات کړي ترڅو پر طالبانو له بریدونو ډډه وکړي. د سرچینو په وینا، د اسلامي جمهوریت دغه اقدام د طالبانو پر وړاندې د مقاومت جبهې د بریدونو د محدودولو په موخه شوی دی.
لیکوال:سعید سمیر
