د امریکا د ولسمشر د یرغملو د چارو ځانګړي استازي، اډم بولر، ویلي چې د طالبانو د پخواني قوماندان حاجي نجیبالله محکومیت د یرغمل نیونې د عاملانو او د ترهګرۍ د ملاتړ کوونکو لپاره یو واضح پیغام لري.
د امریکا د ولسمشر ځانګړي استازي دفتر د چهارشنبې په ورځ په یوه اعلامیه کې ټینګار کړی چې یرغمل نیونه د مذاکراتو وسیله نه ده، بلکې یو جنایي عمل دی او عاملان یې باید د خپلو کړنو ځواب ووایي.
په اعلامیه کې راغلي،هغه کسان چې امریکایي وګړي تښتوي او د هغوی کورنۍ له کړاو او اندېښنې سره مخ کوي، ژر یا وروسته به د خپلو کړنو له پایلو سره مخ شي.
اډم بولر همدارنګه ویلي چې دغه حکم د داسې جرمونو د عاملانو د تعقیب په برخه کې د امریکا د ژمنې څرګندونه کوي او واشنګټن به د عدالت د پلي کېدو او د قربانیانو په استازیتوب د حساب اخیستنې لپاره خپلو هڅو ته دوام ورکړي.
حاجي نجیبالله، د طالبانو پخوانی قوماندان، د امریکایي خبریال ډېوېډ روډ او د هغه د دوو ملګرو د تښتونې په قضیه کې د لاس لرلو په تور د نیویارک یوې محکمې له خوا د ۴۲ کلونو بند په سزا محکوم شوی دی.
امریکایي چارواکو دغه حکم د یرغمل نیونې پر ضد د دوامدارو هڅو او د ورته جرمونو د عاملانو د محاسبې د بهیر یوه برخه بللې ده.
لیکواله:سلیمه آریایي
