لسګونو افغان نجونو په لاس لیکل شويو لیکونو کې د ملګرو ملتونو له سرمنشي انتونیو ګوتریش څخه غوښتي چې په افغانستان کې د ښځو او نجونو وضعیت ته د نړیوالې ټولنې پاملرنه زیاته کړي.
د دغو لیکونو لیکوالانو له ګوتریش څخه غوښتنه کړې چې د نجونو له زدهکړو څخه د محرومیت او پر ښځو د لګول شويو محدودیتونو پر وړاندې چوپ پاتې نه شي او دې موضوع ته په نړیوالو خبرو اترو او پرېکړو کې لومړیتوب ورکړي.
د لیکونو په یوه برخه کې راغلي چې واک ته د طالبانو له بیا رسېدو وروسته، ښځې او نجونې له زدهکړو، فردي ازادیو، ټولنیز ګډون او خپلو یو شمېر بنسټیزو حقونو څخه بېبرخې شوي دي.
یوې نجلۍ په خپل لیک کې ګوتریش ته لیکلي چې د نجونو پر مخ د ښوونځیو او پوهنتونونو دروازې لا هم تړلې دي او ډېرې نجونې خپل راتلونکی او هیلې د له منځه تلو له ګواښ سره مخ ویني. هغې زیاته کړې چې افغان ښځې هره ورځ د خپلو هیلو او د ژوند د فرصتونو د له لاسه ورکولو شاهدانې دي.
په بل لیک کې د افغانستان اوسنی وضعیت «ډېر ستونزمن او د اندېښنې وړ» بلل شوی او لیکوالې د بېوزلۍ، بېکارۍ او پراخو ټولنیزو محدودیتونو یادونه کړې ده. هغې له ملګرو ملتونو غوښتي چې د دې وضعیت پر وړاندې بېپروا پاتې نه شي او له طالبانو سره د اړیکو عادي کول د بشري حقونو، په ځانګړي ډول د ښځو د حقونو، له عملي ښهوالي سره وتړي.
یوې بلې لیکوالې لیکلي چې افغان ښځې له تر ټولو لومړنیو بشري حقونو، لکه د زدهکړې، کار او په ټولنه کې د حضور له حق څخه محرومې شوې دي. هغې له نړیوالې ټولنې غوښتنه کړې چې د افغانستان د ښځو غږ واوري او د هغوی د حقونو د دفاع لپاره اغېزمن ګامونه پورته کړي.
په یو شمېر دغو لیکونو کې ټینګار شوی چې افغان نجونې نه غواړي د نړیوالې چوپتیا قرباني شي او هیله لري چې د افغانستان اړوند غونډو او خبرو اترو کې به د هغوی غږ انعکاس ومومي.
ثنا، چې یوه افغانه نجلۍ ده، په خپل لیک کې د ملګرو ملتونو سرمنشي ته لیکلي چې له طالبانو سره په نړیوالو تعاملاتو او خبرو اترو کې باید د افغانستان د ښځو او نجونو وضعیت په پام کې ونیول شي. هغې له ګوتریش څخه غوښتي چې نړیواله ټولنه وهڅوي څو د ښځو د حقونو د رعایت لپاره لا زیات فشار راوړي.
د دغو لیکونو لیکوالانو همدارنګه ټینګار کړی چې د نجونو پر مخ د ښوونځیو او پوهنتونونو بیا پرانیستل باید د نړیوالو هڅو له لومړیتوبونو څخه وي او د زدهکړې حق باید له افغان ښځو او نجونو څخه وانخیستل شي.
افغانو نجونو د خپلو لیکونو په پای کې خبرداری ورکړی چې د افغانستان د ښځو هېرول د دې هېواد د کلتور، پرمختګ او راتلونکي د خاموشېدو په معنا دي. هغوی د ملګرو ملتونو له سرمنشي څخه غوښتي چې د افغانستان د ښځو او نجونو غږ نړۍ ته ورسوي او د هغوی د زدهکړې، ازادۍ او ټولنیز ګډون د حقونو د دفاع لپاره لا جدي اقدامات ترسره کړي.
لیکواله:سلیمه آریایي
