د بریټانیا نوي لومړي وزیر، انډي برنام، اعلان وکړ چې د اړتیا په صورت کې او د خپل هېواد د ملي ګټو د دفاع لپاره به په ښکاره ډول د امریکا له ولسمشر ډونالډ ټرمپ سره مخالفت وکړي. هغه وویل چې دا موضوع کېدای شي له ایران سره اړوندې پالیسۍ هم په بر کې ونیسي.
برنام د خپل کار له پیل وروسته په خپله لومړنۍ هراړخیزه مرکه کې وویل چې له ټرمپ سره د هغه لومړنۍ ټېلېفوني خبرې «خورا تودې» وې، خو دې مستقیمې پوښتنې ته له ځواب ورکولو یې ډډه وکړه چې ایا پر امریکايي ولسمشر اعتماد لري که نه.
د بریټانیا لومړي وزیر همدا راز له ایران سره وروستۍ نښتې ته په اشارې سره وویل چې د دې جګړې د پیلولو لپاره د امریکا د ولسمشر د پرېکړې په اړه یې «اندېښنې» درلودې. هغه ټینګار وکړ چې په داسې موضوعاتو کې به خپل لیدلوری په څرګند ډول بیان کړي او د هغه څه له ویلو به ډډه ونه کړي چې سم یې ګڼي.
دا څرګندونې په داسې حال کې کېږي چې د راپورونو له مخې، د انډي برنام د لومړي وزیر په توګه د کار له پیلېدو یوه ورځ وروسته، د امریکا یوه بي-۱ بم غورځونکې الوتکه په انګلستان کې له 'فېرفورډ' هوايي اډې څخه الوتلې او د ایران پر ضد په یوه عملیات کې یې برخه اخیستې ده. د دې الوتکې لاره د الوتنو د تعقیب په سیستمونو کې هم د لیدلو وړ وه.
اکسیوس خبري اژانس د باخبره سرچینو په حواله راپور ورکړی چې په دې برید کې د سپاه پاسداران پورې اړوند موخې ویشتل شوي دي. له دې سره سره، امریکايي او بریټانیايي چارواکو د دې راپور په اړه نور جزییات نه دي خپاره کړي.
د بریټانیا حکومت اعلان کړی چې متحده ایالاتو ته یې اجازه ورکړې ترڅو د دې هېواد له پوځي اډو څخه چې د امریکايي ځواکونو او الوتکو د ځای پر ځای کېدو ځای دی د «دفاعي» عملیاتو د ترسره کولو لپاره کار واخلي.
همدا راز، بلومبرګ خبري اژانس راپور ورکړی چې انډي برنام د کیئر سټارمر په مشرۍ د تېر حکومت د هغې پالیسۍ له دوام سره موافقه کړې چې د ایران په اړه وه. د دې پالیسۍ له مخې، امریکا کولای شي په انګلستان کې له 'فېرفورډ' هوايي اډې او د هند په سمندر کې د چاګوس ټاپوګانو له 'دیګو ګارسیا' اډې څخه د هغه څه لپاره کار واخلي چې «دفاعي بریدونه» بلل کېږي.
په ورته وخت کې، د بریټانیا نوی د بهرنیو چارو وزیر، اډ مېلېبنډ، د دې پالیسۍ له سختو مخالفانو څخه ګڼل کېږي. راپورونه ښيي چې د دې موضوع په اړه د هغه دریځونو په سپینه ماڼۍ کې د بهرنیو چارو د وزیر په توګه د هغه د ټاکل کېدو په اړه اندېښنې رامنځته کړي دي.
لیکواله:سلیمه آریایي
