واینټ وېب پاڼې راپور ورکړی چې د موساد د مشر له خوا د سوریې د بهرنیو چارو له وزیر سره د ټیلیفوني اړیکې څلور ورځې وروسته، اسرائیلو په سوریه کې د ابوظهور هوايي اډه د هوايي برید هدف ګرځولې ده.
د راپور له مخې، دغه برید په داسې حال کې ترسره شوی چې یوه ترکي پوځي پلاوي له ابوظهور هوايي اډې څخه لیدنه کړې وه. واینټ د دې برید موخه په سوریه کې د ترکیې د پوځي حضور د پراختیا مخنیوی بللی دی.
په راپور کې ویل شوي چې د اسرائیلو برید د موساد د مشر او د سوریې د بهرنیو چارو د وزیر ترمنځ له ټیلیفوني خبرو لږ وخت وروسته ترسره شوی؛ خو په خپاره شوي راپور کې د دغې اړیکې د محتوا په اړه نور جزییات نه دي وړاندې شوي.
د واینټ په لیکنه، په سوریه کې د ترکیې مخ پر زیاتېدونکي پوځي حضور او د انقرې له خوا د خپل پوځي نفوذ د پراخولو هڅې، په دې تړاو د اسرائیلو له هغو عواملو څخه دي چې پام یې ورته اړولی دی.
د راپور له مخې، پر ابوظهور هوايي اډې برید د اسرائیلو د هغو هڅو په چوکاټ کې ترسره شوی چې هدف یې په سوریه کې د ترکیې د پوځي زېربناوو د رامنځته کېدو یا پراختیا مخنیوی دی.
دا راپور په داسې حال کې خپرېږي چې په سوریه کې د سیمې د هېوادونو د پوځي حضور اړوند تحولات لا هم د دغه هېواد د امنیتي معادلو له مهمو موضوعاتو څخه ګڼل کېږي.
لیکواله:سلیمه آریایي
