په اروپا کې د بېساري ګرمۍ د څپې له امله د مړو شمېر پنجشنبې، د چنګاښ تر څلورمې، پورې له ۲۷۰ کسانو اوښتی دی. هممهاله، په څو اروپايي هېوادونو کې د هوا د تودوخې نوي ریکارډونه ثبت شوي او د روغتیايي چارواکو له لوري د قربانیانو د شمېر د زیاتېدو خبرداری ورکړل شوی دی.
هسپانیه د سختې ګرمۍ له امله د غبرګولي له ۱۳ مې څخه د چنګاښ تر درېیمې پورې د ۲۱۲ مړینو په ثبتولو سره تر ټولو زیات د مړو شمېر راپور کړی دی. د قربانیانو ډېره برخه مشران او هغه کسان جوړوي چې مخکینۍ ناروغۍ لري.
په فرانسه کې هم لږ تر لږه ۵۵ کسان د سختې ګرمۍ څخه د تېښتې پر مهال د ډوبېدو له امله مړه شوي دي. همدارنګه د ګرمۍ له امله د مړینې څو نورې پېښې، د څو ماشومانو په ګډون مړینه، هم راپور شوې دي. هممهاله، د دغه هېواد روغتونونه د ګرمۍ وهلو ناروغانو له بېساري زیاتوالي سره مخ شوي او ځینې روغتیايي مرکزونه د اضطراري وضعیت په حالت کې دي.
په جرمني کې هم د ګرمۍ څپه د بېسارې تودوخې د ثبت، د اورګاډي د ترانسپورټ د ګډوډۍ او د پېښو د زیاتوالي لامل شوې ده. راپورونه ښيي چې لږ تر لږه څو کسان هم د سختې ګرمۍ او ډوبېدو له امله خپل ژوند له لاسه ورکړی دی.
په وروستیو ورځو کې د اروپا په پراخو سیمو کې د هوا تودوخه ۴۰ درجې سانتيګراد او تر هغه لوړه شوې ده. دې حالت د ښوونځیو د تړلو، د ترانسپورټي شبکو د ګډوډۍ، د برېښنا او روغتیايي خدماتو پر سیستم د فشار زیاتېدو او د ځینو عامه غونډو د لغوه کېدو لامل شوی دی.
د نړیوالې هواپوهنې سازمان کارپوهان او د اقلیم څېړونکي ټینګار کوي چې د انساني فعالیتونو له امله د اقلیمي بدلونونو له کبله د داسې سختو ګرمۍ څپو د رامنځته کېدو احتمال په څرګند ډول زیات شوی دی. اروپايي چارواکو هم خبرداری ورکړی چې د راتلونکو ورځو په دوامدارې سختې ګرمۍ سره د مړو د شمېر د زیاتېدو امکان لا هم شته.
لیکواله:سلیمه آریایي
