د پاکستان د بهرنیو چارو وزارت وايي، دغه هېواد په ترهګرۍ ضد جګړه کې تر ۹۰ زرو ډېر کسان له لاسه ورکړي او د دغې مبارزې له امله یې اقتصادي زیان له ۱۵۰ میلیارد امریکايي ډالرو اوښتی دی.
د پاکستان بهرنیو چارو وزارت د جمعې په ورځ د ترهګرۍ د قربانیانو د یاد او درناوي د نړیوالې ورځې په مناسبت په یوه اعلامیه کې ویلي، چې ۲۰۲۵ کال د امنیتي پېښو له پلوه د تېرو څه باندې یوې لسیزې له تر ټولو خونړیو کلونو څخه و.
په اعلامیه کې ویل شوي، د ترهګرۍ د قربانیانو نړیواله ورځ یوازې د مراسمو لپاره نه ده، بلکې د قربانیانو د ژوند، د هغوی د کورنیو د درد او د ترهګرۍ پر وړاندې د مبارزې د دوام د ارزونې لپاره هم فرصت دی.
اسلاماباد ادعا کوي چې ترهګري اوس په بېلابېلو بڼو راڅرګندېږي او وسلهوالې ډلې له نوې ټکنالوژۍ او سایبري فضا څخه د خپلو فعالیتونو او بریدونو د پراخولو لپاره استفاده کوي.
د پاکستان بهرنیو چارو وزارت، پرته له دې چې د کوم هېواد نوم واخلي، ویلي چې د پولې هاخوا له پټنځایونو څخه د تاوتریخوالي د بریدونو پلانونه، تمویل او لارښوونه کېږي. د وزارت په وینا، په دغو بریدونو کې ملکي وګړي، ښځې، ماشومان او امنیتي ځواکونه هم په نښه کېږي.
اسلاماباد ټینګار کړی چې د ترهګرۍ پر وړاندې مبارزه به دوام ولري او د دې ګواښ د مخنیوي لپاره د نړیوالې همکارۍ پر اړتیا یې هم ټینګار کړی دی.
لیکوال:سعید سمیر
