د امریکا د بهرنیو چارو وزارت ویلي، چې واشنګټن د «ترهګریزو بریدونو» پر وړاندې د ځان د دفاع په برخه کې د پاکستان د حق ملاتړ کوي. دغه څرګندونې داسې مهال شوي چې د افغانستان او پاکستان ترمنځ د سرحدي تاوتریخوالي او پوځي عملیاتو په اړه تازه بحثونه روان دي.
د راپورونو له مخې، پاکستان په تېرو څو کلونو کې لږ تر لږه ۱۳ ځله د افغانستان دننه اهداف په نښه کړي او هوايي یا ځمکني بریدونه یې ترسره کړي دي. اسلاماباد دا عملیات د هغو وسلهوالو پر ضد توجیه کوي چې د دوی په وینا له افغان خاورې څخه د پاکستان دننه بریدونه تنظیموي.
افغان لوری بیا دغه ډول بریدونه د ملي حاکمیت سرغړونه بولي او وایي چې په دې عملیاتو کې کله ناکله ملکي وګړو ته هم زیان اوړي. کابل له اسلاماباد څخه د داسې اقداماتو د درولو غوښتنه کوي او ټینګار کوي چې د امنیتي ستونزو حل باید له ډیپلوماټیکو لارو وشي.
په همدې حال کې، د امریکا د بهرنیو چارو وزارت وروستۍ څرګندونې د پاکستان د دفاعي دریځ د ملاتړ په توګه تعبیر شوي، خو له بلې خوا د افغانستان دننه د ترسره شویو ۱۳ بریدونو موضوع د سیمهییزو ترینګلتیاوو د زیاتېدو یو مهم عامل بلل کېږي.
لیکوال:سعید سمیر
