د امريکا د خپلواکۍ د ۲۵۰مې کليزې مراسم، سره له دې چې د اوړي سختو توپانونو او د رسمي پروګرامونو د يوې برخې ځنډ رامنځته کړی و، د شنبې په ماښام د دغه هېواد په بېلابېلو ښارونو کې ترسره شول. ميليونونو کسانو د جشنونو، پوځي او ولسي لاريونونو او اورلوبو کې په ګډون سره دغه مناسبت ولمانځه.
په واشنګټن کې د اوړي توپانونو د مراسمو بهير ګډوډ کړ، او امنيتي چارواکو له هغو کسانو چې د واشنګټن يادګار شاوخوا راټول شوي وو وغوښتل چې سيمه پرېږدي او سرپټو ځايونو ته ولاړ شي. له همدې امله، د مراسمو پيل څو ساعته وځنډېد.
د رویټرز خبري اژانس د راپور له مخې، د «فریډم ۲۵۰» ډلې، چې د دغو مراسمو د تنظيم مسؤليت يې پر غاړه درلود، وويل چې د هوا له ښه کېدو وروسته ګډونوال بېرته د مراسمو ځای ته ننوتل، او د امريکا د ولسمشر ډونالډ ټرمپ وينا د شپې د لسو بجو پر ځای د امريکا د ختیځ په وخت د شپې په يوولسو بجو پيل شوه.
ټرمپ د مراسمو له ترسره کېدو مخکې په خپلې ټولنيزې شبکې کې ليکلي وو چې «په هر ډول شرايطو کې» به په دې پروګرام کې ګډون وکړي. هغه له خلکو وغوښتل چې په جشن کې ګډون وکړي، حتی که پروګرام د شپې تر ناوخته دوام وکړي.
ګډونوال د مراسمو ځای ته د ننوتلو لپاره ساعتونه په اوږدو کتارونو کې د نږدې ۳۹ درجې سانتيګراد تودوخې لاندې په انتظار کې وو. د سختې ګرمۍ له امله د واشنګټن په سيمه کې يو شمېر لاريونونه او نور پروګرامونه هم لغوه شول.
ټرمپ په خپله وينا کې د امريکا پر تاريخ، ارزښتونو او ځواک ټينګار وکړ، او د مراسمو په يوه برخه کې يې د دويمې نړيوالې جګړې له هغو پخوانيو سرتېرو څخه مننه او درناوی وکړ چې د امريکا په پوځ کې يې خدمت کړی و.
د امريکا ولسمشر د خپلو خبرو په يوه برخه کې ايران ته هم اشاره وکړه او د اسلامي جمهوريت پر وړاندې يې د خپل حکومت له تګلارې دفاع وکړه. هغه ادعا وکړه چې د امريکا وسلهوالو ځواکونو د ايران د اسلامي جمهوريت پوځي وړتياوې کمزورې کړې او د دغه هېواد د سمندري ځواکونو ټولې بېړۍ يې له منځه وړې دي. دغه ادعا د ټرمپ له خوا شوې ده او په دې راپور کې په خپلواکه توګه نه ده ارزول شوې.
لیکواله:سلیمه آریایي
