د ملګرو ملتونو د وګړو صندوق اعلان کړی چې افغانستان د هغو هېوادونو له ډلې څخه دی چې په نړۍ کې د زېږون د فیستولا تر ټولو ډېرې پېښې لري.
د دې ادارې د راپور له مخې، افغانستان د دې ناروغۍ د کچې له پلوه پنځم هېواد بلل کېږي، او شاوخوا ۱۵ زره ښځې او نجونې په دغه هېواد کې له دې د زېږون له امله رامنځته شوې ستونزې سره ژوند کوي.
د زېږون فیستولا یوه جدي روغتیايي ستونزه ده چې د سخت زېږون او د مناسب روغتیايي پاملرنې د نشتوالي له امله رامنځته کېږي، او کولی شي د ښځو د فزیکي معلولیت او ټولنیزې انزوا لامل شي.
د ملګرو ملتونو د وګړو صندوق ویلي چې د دې ناروغۍ مخنیوی او درملنه، روغتیايي خدمتونو، خوندي جراحۍ او اړینو تجهیزاتو ته د لاسرسي اړتیا لري.
دې ادارې ټینګار کړی چې د روغتیايي سیستم پیاوړتیا او د زېږون پر مهال د ښځو د پاملرنې زیاتول، د دې ستونزې د کمېدو له مهمو عواملو څخه دي.
دې سازمان همدارنګه د فیستولا د له منځه وړلو لپاره د هڅو پر دوام ټینګار کړی او ویلي یې دي چې دې ستونزې ته رسېدنه، د زیانمنو هېوادونو، په ځانګړي ډول افغانستان، کې د میندو د روغتیا د ښهوالي د پراخو پروګرامونو یوه برخه ده.
لیکواله:سلیمه آریایي
