قزاقستان د ۲۰۲۶ کال د جنوري او مې میاشتو ترمنځ افغانستان ته ۸۱ اسونه صادر کړي دي. د قزاقستان د رسمي شمېرو له مخې، په همدې موده کې د هېواد د څارویو او چرګانو صادرات د تېر کال د ورته مودې په پرتله ۱.۷ برابره زیات شوي دي.
د راپور له مخې، قزاقستان په یادو پنځو میاشتو کې ټولټال ۷۱۷ زره او ۲۰۰ څاروي او چرګان، د شاوخوا ۷.۹ میلیونه ډالرو په ارزښت، بهرنیو بازارونو ته صادر کړي دي.
په دې موده کې ازبکستان د قزاقستان د اسونو تر ټولو لوی پېرودونکی و او ۱۷ زره او ۶۰۰ اسونه یې وارد کړي دي. همدارنګه ۱۲۹ اسونه چین، ۸۱ اسونه افغانستان او ۶۲ اسونه اذربایجان ته صادر شوي دي.
ورسره، د کورنیو چرګانو صادرات دوه برابره زیات شوي او ټول ۶۴۵ زره چرګان تاجکستان ته لېږدول شوي دي. د پسونو صادرات هم ۳.۳ برابره لوړ شوي او ۴۸ زره او ۷۰۰ پسونه ازبکستان ته صادر شوي دي.
لیکوال:سعید سمیر
