د طالبانو د صنعت او سوداګرۍ وزارت اعلان کړی چې په کابل کې د افغانستان او قزاقستان د ګډې غونډې پر مهال د دواړو هېوادونو د خصوصي سکټورونو ترمنځ ۲۵ د همکارۍ تفاهملیکونه لاسلیک شوي دي. د یاد وزارت په وینا، د دغو تفاهملیکونو موخه د سوداګریزو اړیکو پراختیا او د افغانستان او قزاقستان ترمنځ د وارداتو او صادراتو د بهیر اسانتیا ده.
د خپرو شویو معلوماتو له مخې، دغه تفاهملیکونه د دوه اړخیزې سوداګرۍ بېلابېلې برخې رانغاړي. د مصالحو او درملیزو توکو راکړه ورکړه، د تازه او وچو مېوو او سبزیجاتو صادرات او واردات، او همدارنګه د اوړو، غنمو، غوړیو او کچالو په ګډون د بنسټیزو توکو تبادله د دغو هوکړو له مهمو برخو څخه شمېرل کېږي.
دواړو لورو د بانکي همکاریو د پراختیا او د داسې میکانیزمونو د رامنځته کولو په اړه هم موافقه کړې چې د دواړو هېوادونو د سوداګرو ترمنځ مالي راکړه ورکړه اسانه کړي. دا اقدام کولی شي اقتصادي او سوداګریزې همکارۍ لا زیاتې پیاوړې کړي.
دغه تفاهملیکونه کابل ته د قزاقستان د لومړي وزیر مرستیال، سیریک ژومان ګارین، د سفر پر مهال لاسلیک شول. نوموړی د یوه لوړپوړي پلاوي په مشرۍ افغانستان ته راغلی او د سفر په ترڅ کې یې د طالبانو د ادارې له یو شمېر چارواکو، لکه محمد حسن آخند، سراجالدین حقاني او نورالدین عزیزي سره لیدنې او خبرې کړي دي.
سره له دې چې قزاقستان د نړۍ د ډېرو نورو هېوادونو په څېر تر اوسه د طالبانو اداره په رسمیت نه ده پېژندلې، خو په وروستیو کلونو کې د دواړو لورو ترمنځ سیاسي او اقتصادي اړیکې د پراخېدو په حال کې دي. په دې موده کې د افغانستان او قزاقستان لوړپوړو چارواکو څو ځله کابل او آستانه ته سفرونه کړي او د دوه اړخیزو همکاریو د پراختیا په اړه یې سلا مشورې کړي دي.
لیکواله:سلیمه آریایي
