د بنګلهدېش مشهوره فلمي لوبغاړې او ماډله، ردیکا ردي، د دغه هېواد په پلازمېنه ډاکه کې په خپل کور کې مړه موندل شوې ده.
د بنګلهدېشي رسنیو د راپورونو له مخې، د ردیکا ردي مړی د ډاکې د بشندهرا سیمې په یوه کور کې موندل شوی دی.
پولیس وايي، د پېښې د خبر ترلاسه کولو وروسته امنیتي ځواکونه د پېښې ځای ته رسېدلي او د اداکارې مړی یې، چې د چت له پکې سره ځړول شوی و، روغتون ته د عدلي معاینې لپاره لېږدولی دی.
د پولیسو په وینا، د ردیکا ردي مور په ثبت کړي شکایت کې د هغې ملګری، حسیب الرحمان، د پېښې په تړاو تورن کړی دی. پولیسو حسیب الرحمان نیولی او محکمې ته یې وړاندې کړی دی.
چارواکي وايي، د پېښې د څرنګوالي او ټولو اړخونو په اړه څېړنې روانې دي. د ردیکا ردي د مړینې کره لامل لا تر اوسه په رسمي ډول نه دی تایید شوی او پولیس د عدلي معاینې او تحقیقاتو پایلو ته په تمه دي.
لیکوال:سعید سمیر
