نیمار، د برازیل د فوټبال ستوری، د ۲۰۲۶ کال د نړیوال جام په یو اتم پړاو کې د ناروې پر وړاندې د خپل ټیم د ۲-۱ ماتې وروسته د ملي لوبډلې له پای ته رسولو خبر ورکړ. هغه د نیویارک په مټلایف لوبغالي کې په اوښکو سره وویل: «ما هڅه وکړه، هڅه مې وکړه. اوس هر څه پای ته رسېدلي دي. دلته مې پیل کړی و او دلته یې هم پای ته رسوم.»
دغه ۳۴ کلن بریدګر د ناروې پر وړاندې لوبه کې د برازیل یوازینی ګول د لوبې په ۱۰+۹۰ دقیقه کې د پنالټي له لارې وواهه، خو د ارلینګ هالند دوه ګولونه لامل شول چې سیلساؤ له سیالۍ بهر شي. دا ماته د ۱۹۹۰ کال وروسته د برازیل تر ټولو ژر ناکامي بلل کېږي.
د لوبې له پای وروسته، نیمار پر میدان کښېناست او ویې ژړل. د برازیل ملي لوبډلې لوبغاړي د هغه د تسلیت لپاره ورټول شول او څو دقیقې وروسته هغه سکو ته لاړ او هلته یې له خپلې مېرمنې برونا بیانکاردي او زوی داوي لوکا سره یوځای وخت تېر کړ.
نیمار خپله لومړۍ ملي لوبه د ۲۰۱۰ کال په اوړي کې د متحده ایالاتو پر وړاندې په دوستانه لوبه کې د مټلایف په لوبغالي کې ترسره کړه. هغه په هماغه لومړۍ لوبه کې خپل لومړی ملي ګول هم وواهه، او اوس له ۱۶ کلونو وروسته د ملي لوبډلې له دندو څخه لاس اخلي.
هغه د ۸۰ ګولونو په وهلو سره د برازیل د ملي لوبډلې د تاریخ تر ټولو غوره ګول وهونکی دی او د پله څخه درې ګولونه زیات لري. همدارنګه د ناروې پر وړاندې ګول هغه دوهم برازیلي لوبغاړی کړ چې د پله وروسته په څلورو نړیوالو جامونو کې ګول وهي.
نیمار په مجموع کې ۱۳۰ ځله د برازیل کمیس واغوست او له دې اړخه د کافو له ۱۴۲ لوبو وروسته د سیلساؤ دوهم تر ټولو باتجربه لوبغاړی بلل کېږي. هغه په وروستیو کلونو کې له ګڼو ټپونو سره مخ و، چې له امله یې په ملي لوبډله کې د هغه دوامداره حضور او اغېز کم شو.
دغه ستوری په ۲۰۲۶ نړیوال جام کې د پښې د مزمن ټپ له امله یوازې په دوو لوبو کې ولوبېد؛ هغه د سکاټلنډ پر وړاندې په ۱۵مه دقیقه کې او د ناروې پر وړاندې له ۶۷ مې دقیقې وروسته د بدیل لوبغاړي په توګه میدان ته ښکته شو.
د نیمار د تقاعد له اعلان سره، د برازیل د ملي لوبډلې د تاریخ یو له تر ټولو ویاړلی پړاو پای ته ورسېد او د دې هېواد فوټبال نوي پړاو ته داخل شو، چې تمه کېږي نوی نسل د سیلساؤ مشري پر غاړه واخلي.
لیکواله:سلیمه آریایي
