هرات له اته ویشت زره هکټاره ډېرو مېوه لرونکو باغونو سره د هېواد د بڼوالۍ له مهمو مرکزونو څخه شمېرل کېږي
د هرات د کرنې برخې مسؤلین وایي، د روان کال د تازه مېوو حاصلات د تېرو کلونو په پرتله زیات شوي دي. هرات چې له اته ویشت زره هکټاره ډېرو مېوه لرونکو باغونو څخه برخمن دی، د هېواد د بڼوالۍ د تولیداتو له مهمو مرکزونو څخه ګڼل کېږي.
د موجودو شمېرو له مخې، هر کال د هرات له باغونو څخه زرګونه ټنه بېلابېلې مېوې لکه انګور، انار، زردالو، شفتالو، مڼه او خواږه شفتالو راټولېږي او کورنیو او بهرنیو بازارونو ته وړاندې کېږي. مناسب اقلیم او د بڼوالۍ پراختیا د هرات د مېوو د تولید د زیاتوالي مهم عوامل بلل کېږي.
له تولیداتو د زیاتوالي سره هممهاله، د صادراتي بازارونو د پراختیا، د ترانزیټي اسانتیاوو د ښه والي او د کرنې سکټور د اړوندو بنسټیزو زیربناوو د پراختیا لپاره هڅې هم روانې دي. مسؤلین هیله لري چې دغه اقدامات به سیمهییزو او نړیوالو بازارونو ته د بڼوالۍ د محصولاتو د ښه لاسرسي زمینه برابره کړي.
کارپوهان باور لري چې د تازه مېوو د حاصلاتو زیاتوالی کولی شي د کرنې سکتور په وده، د کاري فرصتونو په رامنځته کولو او د بڼوالو د عاید په لوړولو کې مهم رول ولوبوي. همدارنګه، د هرات د بڼوالۍ د محصولاتو د صادراتو پراختیا کولی شي د هېواد په اقتصاد کې د دې ولایت ونډه لا پیاوړې کړي.
لیکواله:سلیمه آریایي
