د ایران د تېلو وزیر، محسن پاکنژاد، اعلان کړی چې دې هېواد متحده ایالاتو سره د جګړې او اوربند په دوره کې، ۱۸ میلیارده ډالره تېل پلورلي دي. د هغه په وینا، له دې پلور څخه ترلاسه شوی عاید په کلنۍ بودیجه کې د ایران د پیشبیني شوو تېلي عایداتو څه باندې ۶۰ سلنه برخه چمتو کړې ده.
د ایران د تېلو وزیر وویل د تېلو د ټانکرونو د تګ راتګ لپاره د ګواښونو کمېدو، د تېلو د صادراتو د زیاتوالي زمینه برابره کړې او د دې هېواد د خامو تېلو د ځینو زیرمو د پلورلو امکان یې هم رامنځته کړی دی. هغه زیاته کړه چې ایران د خامو تېلو او ګازو له ۱۰۰ میلیونه بوشکو ټولو زیرمو څخه، یوه برخه پلورلې ده.
دا څرګندونې په داسې حال کې کېږي چې د وروستیو پوځي نښتو له امله د ایران او متحده ایالاتو ترمنځ ترینګلتیاوې تر اوسه دوام لري. په ورته وخت کې، د سمندري لارو د امنیت، په ځانګړې توګه د هرمز په تنګي کې چې د نړۍ د انرژۍ د لېږد یو له ترټولو مهمو لارو څخه دی، د تېلو د ټانکرونو د تګ راتګ په اړه اندېښنې زیاتې شوي دي.
لیکواله:سلیمه آریایي
