د طالبانو په وینا، سره له دې چې د افغانستان او پاکستان ترمنځ ځینې کړکېچونه موجود دي، د سیمې پر اقتصادي پروژو او د هغو د پلي کېدو پر بهیر یې هېڅ منفي اغېز نه دی کړی.
د طالبانو ویاند زیاته کړې چې د هغو ټولو پروژو چارې او فعالیتونه چې د منځنۍ آسیا او سوېلي آسیا ترمنځ د پراختیا په حال کې دي، په منظم ډول روان دي.
ذبیحالله مجاهد همدارنګه ټینګار کړی چې دا ډله د سیمهییزو اقتصادي پراختیایي پروژو پلي کولو او د دغو بهیرونو بشپړولو ته ژمنه ده.
د مجاهد په وینا، که څه هم په دې وروستیو کې د افغانستان او پاکستان ترمنځ د رامنځته شویو ترینګلتیاوو له امله د دواړو هېوادونو اقتصادي او سیاسي اړیکې تر یوه حده کمزورې شوي دي، خو د ټاپي، ټاپ، کاسا-۱۰۰۰ او افغان ټرانس په څېر پروژې لا هم روانې دي؛ هغه پروژې چې د سیمې په اقتصادي پرمختګ کې مهم رول لوبولی شي.
مجاهد وویل: «د ټاپي پروژه د افغانستان په خاوره کې تر کار لاندې ده، چارې یې په عادي ډول روانې دي او لا چټکې شوې هم دي. د ټاپ او ځینو نورو پروژو په اړه څېړنې روانې وې او بشپړې شوي دي، او د دوی پر وړاندې هېڅ خنډ نشته. موږ هڅه کوو چې سترې پروژې په عادي او منظم ډول پر مخ ولاړې شي.»
لیکواله:سلیمه حکیمي
