په لومړي ځل، د نیمهقیمتي ډبرو «ګرین ګارنېټ» د پنجشیر ولایت د معدني محصولاتو په رسمي لیلام کې وړاندې شو. د طالبانو سیمهییزې ادارې دا پېښه د قیمتي ډبرو د سوداګرۍ د پراختیا او په دې ولایت کې د کانونو د فعالیتونو د زیاتوالي په لور یو ګام بللی دی.
د خپرو شویو معلوماتو له مخې، په دې لیلام کې ۳ زره او ۲۹۷ قیراط زمرد د ۱۹۸ زره او ۳۷۰ امریکایي ډالرو په ارزښت وپلورل شول. همدارنګه د ګرین ګارنېټ ۱۳ نمونې هم معامله شوي دي. د دې لیلام په ګډونوالو کې د قیمتي ډبرو یو چینایي سوداګر هم شامل و.
د دې لیلام له ترسره کېدو سره هممهاله، د کانونو د پلور د بهیر د شفافیت، د طبیعي سرچینو د عوایدو د مدیریت او د دې عوایدو د لګولو د څرنګوالي په اړه پوښتنې لا هم مطرح دي. منتقدان وايي تر هغه وخته چې د عوایدو، قراردادونو او د معدني سرچینو د عوایدو د مصرف جزئیات په شفاف ډول خپاره نه شي، د اقتصادي پراختیا او د کاري فرصتونو د رامنځته کېدو په اړه د مطرح شویو ادعاوو ارزونه ستونزمنه ده.
ځینې اقتصادي کارپوهان هم په دې باور دي چې د بهرنیو پانګوالو او سوداګرو، لکه د چینایي پېرېدونکو، شتون هغه وخت د افغانستان اقتصاد ته ګټه رسولی شي چې د کانونو معاملې د شفافیت، حسابورکونې او خپلواکې څارنې پر بنسټ ترسره شي. د هغوی په وینا، که داسې نه وي، نو د طبیعي سرچینو د مدیریت او د کانونو د عوایدو د برخلیک په اړه اندېښنې به لا هم پاتې وي.
لیکواله:سلیمه آریایي
