د اراک او کرمانشاه د سیمې د اوسپنې پټلۍ عمومي رئیس اعلان کړی چې له عراق څخه افغانستان ته د ایران له لارې د ګډ ترانزیټ لومړنۍ جوپه لېږدول شوې ده. د هغه په وینا، دغه محموله د کرمانشاه د باروړونکي تمځای له لارې د ایران د رېل پټلۍ شبکې ته داخل شوې او د رېل له کرښو څخه افغانستان ته د لېږد په حال کې ده.
احمد ترکي له ایرنا خبري آژانس سره په خبرو کې وویل، دغه جوپه له چمتووالي او بارولو وروسته د کرمانشاه له باروړونکي تمځای څخه د هېواد د رېل شبکې کې شامله شوې او د ایران د ختیځو لارو له لارې افغانستان ته استول کېږي.
هغه دغه اقدام د هېواد د ترانزیټي ظرفیتونو د ګټې اخیستنې او د نړیوال رېلي ترانزیټ د پراختیا په برخه کې یو مهم ګام وباله او ویې ویل چې دا مسیر کولای شي د سیمې د ترانسپورټي همکاریو په پراختیا کې مهم رول ولوبوي.
د احمد ترکي په وینا، دغه پروژه د ایران د اسلامي جمهوریت د اوسپنې پټلۍ د عمومي تګلارو په چوکاټ کې د ترانزیټي بارونو د جذب او د ګډ ترانسپورټ د پراختیا لپاره پلي شوې ده.
هغه زیاته کړه چې د دې لارې فعالېدل به د ایران د رېل پټلۍ له لارې د سوداګریزو راکړو ورکړو کچه لوړه کړي او د سیمې په ترانزیټي دهلېزونو کې به د رېلي ترانسپورټ د ونډې د پیاوړتیا زمینه برابره کړي.
د اراک او کرمانشاه د سیمې د اوسپنې پټلۍ عمومي رئیس ټینګار وکړ چې د دې محمولې په عملي کېدو سره افغانستان ته د توکو د لېږد لپاره د لوېدیځ څخه ختیځ ته ترانزیټي مسیر فعال شوی او په راتلونکي کې د دې بهیر د تکرار او پراختیا امکان هم شته.
کرمانشاه ولایت له عراق سره څه باندې ۳۷۱ کیلومتره ګډه پوله لري او د دې پولې په اوږدو کې دوه رسمي سرحدي بندرونه او پنځه فعال سرحدي بازارونه شتون لري.
د رسمي شمېرو له مخې، هر کال نږدې ۳ میلیارده ډالره ارزښت لرونکي توکي د کرمانشاه له پولو څخه بېلابېلو هېوادونو ته صادرېږي، او د عراق لپاره د ایران د صادراتو یوه د پام وړ برخه هم د همدې پولو له لارې ترسره کېږي.
نویسنده:سلیمه آریایي
