د جوزجان ولایت د اقچې ولسوالۍ په نورآباد مهاجرینو ښارګوټي کې د ۲۵ میلیونه افغانیو په لګښت د قالینو د تولید او پروسس دوې مرکزونه پرانیستل شول. د دغو مرکزونو د جوړېدو موخه بېرته راستنو شویو مهاجرینو ته د تلپاتې روزګار برابرول او د سیمه ییز اقتصاد پیاوړي کول ښودل شوي دي.
د خپرو شویو معلوماتو له مخې، د دغو دوو مرکزونو په فعالیت پیلولو سره تر ۵۵۰ زیاتو کسانو ته د کار زمینه برابره شوې ده. دا مرکزونه به د قالینو د تولید او پروسس په برخه کې فعالیت کوي او په سیمه کې د کارموندنې او اقتصادي پراختیا د ملاتړیزو پروګرامونو یوه برخه ګڼل کېږي.
لیکواله:سلیمه آریایي
